ТывКУ-нуң төөгү факультединиң «Мандарин» онлайн школазынче уруглар кыдат дылды өөренири-биле кээп турар.
Школа уругларга кыдат чоннуң культуразын, төөгүзүн, дылының чажыттарын таныштырар. Ону ниити төөгү, археология болгаш документоведение кафедразы организастаан. Ынаар Кызыл хоорайның база ыраккы Каа-Хемниң школаларындан өөреникчилер бижиттирип алган. А кыдат дылды ТывКУ-нуң партнеру – Моол Национал университединде Конфуций Инстутудунуң салбырынга өөренип турган 3-кү курсчу студентилер школачыларга өөредир. Баштайгы кичээлге студентилер Айыс Монгуш, Алдынай Ооржак, Адис Монгуш кыдат дылдың онзагайларын уругларга таныштырган. Ийи шак ишти үргүлчүлээр өөредилгеже дылдың фонетиказы, грамматиказы база бижилгениң ниити дүрүмнери кирер.
Уруглар Quizlet онлайн-капсырылга таварыштыр оюн хевиринге чаа сөстерни өөренир.
«Хүн бүрүзүнде чаа ажыдыышкыннар» — школаның девизи.
