Чөөн-Хемчик кожууннуң Мерген-Херел Монгуш аттыг культура бажыңынга «Ойнаар-кыстар» деп бичии салым-чаяанныг чараш уруглар мөөрейи болуп эрткен. Аңаа школа назыны четпээн 5-6 харлыг 20 чаптанчыг чаштар киришкен.

Бичии уруглар сцена кырынче национал хевин бараалгадып үнер көргүзүгден мөөрей эгелээн. Уруглар, шынап-ла, бичии ойнаар-кыстарга дөмей. Ийиги көргүзүгде чаптанчыгбайлар кежээки байырлал хевин бараалгаткан. Чаштар мөөрейге боттарының салым-чаяанын тура дүшпейн көргүскен. А көргүзүглерниң аразында Чадаана хоорайның «Малышок», «Родничок» уруглар садтарының чаштары ырлап-шоорлаан.

Чаптанчыг мөөрейниң түңнелинде шупту киржикчилер өртектиг белектерни ап, дипломнарга төлептиг болган. Чөөн-Хемчик кожууннуң «Ойнаар-кыс-2022» атты «Чечена» уруглар садындан Сардана Сегленмей чаалап алган.
«Бирги вице Ойнаар-кыс», «Ийиги вице Ойнаар-кыс» аттарны Анай-Хаак Сумадай база Чимис Намчылдай үлешкен. «Национал хеп» номинацияга Алдын-Туя кара-Сал, «Кежээки хеп» номинацияга Габриела Монгуш төлептиг болганнар. А кожууннуң «Модницазы» атты Санджна Соян чаалап алган. «Көрүкчулерниң үнелели» Айлуна Сатта база «Салым-чаяан» номинациязын Амина Юлдошева ээлээн.

Культура бажыңының медээзинден Мира КОНГУЛ-ООЛ белеткээн.