Тываның Баштыңы Владислав Ховалыг Моолче албан аайы-биле чорааш, чурттуң президентизи Ухнаагийн Хурэлсух-биле ужурашкан. Республиканың удуртукчузу моол таланың чалалгазы-биле, Тыва-биле кызыгаарлашкак Увс аймактың 100 чылдаанынга тураскааткан байырлал хемчеглеринде киржип турарын сагындыраал.
Владислав Ховалыг ужуражылга үезинде, Кызыл хоорайга Тиилелге парадынга чурттуң шериг албанныгларының киржилгези дээш Моолдуң Президентизинге өөрүп четтиргенин илереткеш, Ада-чурттуң Улуг дайынының үезинде акы-дуңма моол чоннуң Совет Армияга көргүскени улуг деткимчезин онзалап демдеглээн.
Владислав Ховалыг Моолдуң Евразийжи экономиктиг эвилелче түр када кежигүн кылдыр кирер дугуржулгага атты салганы дээш Ухнаагийн Хүрэлсухка байырын чедирген. Бо документ ЕАЭЭ-ниң кежигүннери чурттар болгаш Моолдуң аразында садыг-саарылга харылзааларының хөгжүлдезиниң чаа чадазын илередип турар.
Евразияның экономиктиг эвилели он чыл бурунгаар ажылын эгелээн болгаш ооң составында Россия, Белоруссия, Казахстан, Кыргызстан база Армения кирип турар. Эвилелдиң кол сорулгазы – бараанның, капиталдың болгаш күш-ажылчы курлавырларның хостуг шимчээшкининге байдалдарны тургузары. Ат салган керээ 367 бараан кезектерин хаара тудар, дугуржулганың күш кирген хүнүнден эгелеп каайлы төлевири тикке бадып, азы ооң бичии-ле улуг болур. Владислав Ховалыг бо болуушкун кожа-хелбээ регионнар аразында ажыл-агыйжы харылзааларның өзүлдезинге идиг болур дээрзинге бүзүрелин илереткен.
Владислав Ховалыг Тыва Республикадан белек кылдыр Моолдуң президентизинге Тубтен Шедруб Линг сарыг шажын хүрээзиниң чуруун сөңнээн. Россияда эң улуг сарыг шажын хүрээзинге келир чылын болур IV делегей чергелиг буддийжи шуулганга Моолдуң төлээлери база киржир. Шуулган Россияның Президентизи Владимир Путинден деткимчени алган болгаш, федералдыг эрге-байдалдыг.
Тыва биле Моолду чүгле төөгүлүг, культурлуг болгаш шажынчы харылзаалар эвес, а үе дүптүң садыг-экономиктиг харылзаалары каттыштырып турарын республиканың Баштыңы ужуражылга үезинде демдеглээн. «Россия-Моол-Кыдат стратегтиг кады ажылдажылгазының Төп-Евразийжи транспорт коридорун тудар дээн Россия биле Моолдуң эгелээшкиннери-биле холбаштыр Тыва биле Увс аймактар экономиктиг хөгжүлдеге чугула идигни ап турар, бистиң республиканың девискээринге тудар тускай экономиктиг зона ону улам күштелдирер» — деп, Владислав Ховалыг демдеглээн.
Ол ышкаш күрүнелер аразында кады ажылдажылганың хөгжүлдезинге эрткен чылдың октябрьда хүлээп алдынган Россия-Моолдуң садыг-экономиктиг, эртем-техниктиг кады ажылдажылга талазы-биле ийи чурттуң чазааның аразында комиссияның шиитпирлериниң үлүг-хуузун демдеглээн. Ийи чурттуң аразында кады ажылдажылганы быжыглаарынче угланган тускай санал-оналдарны ажылдап кылган.
тыва чазак
