Тыва дылды чурагайжыдар ажылдар уламчылап турар

Тываның Баштыңы Владислав Ховалыг 2033 чылга чедир тыва дылды хөгжүдериниң болгаш күрүнеден деткиириниң үр хуусаалыг эчис сорулгазында бадылаан хемчеглер-биле ол бүгү ажылдарны ам-даа уламчылаарын дыңнаткан.

– Тыва дылывысты долузу-биле ажыглап чорзун, ол ышкаш ажы-төлге ону ол-ла хевээр дамчыдып бээр дээш, бүгү-ле чүүлдерни кады кылып турар бис.

“Яндекс. Клавиатура” сервисте тыва дылды киирген, кылымал угаанның системазында tyvan.ru онлайн-очулдурукчуну ажыглап эгелээн. Эрткен чылдың июньда тыва дыл “Google. Очулдурукчуда” көстүп келген, ам ону «Яндекс. Очулдурукчу» сервисче киирер ужурлуг. Нейрочеткиниң өөренип көөрүнге херек 5 сая хире сөстер каттыжыышкыннарын, тыва, орус дылдарда чергелешкек очулгалыг 280 муң ажыг домактарны дамчыткан.

2033 чылга чедир тыва дылды хөгжүдериниң болгаш күрүнеден деткиириниң үр хуусаалыг эчис сорулгазында бадылаан хемчеглер-биле ол бүгү ажылдарны ам-даа уламчылаар бис – деп, Владислав Ховалыг социал четкилерде бодунуң блогунга демдеглээн.

2023 чылдың августа Владислав Ховалыг, 2024-2033 чылдарда Тыва Республикада тыва дылды хөгжүдеринге күрүне деткимчезиниң ажылдап кылган эчис сорулгазынга атты салганын сагындыраал.

Узун хуусаалыг планның кол сорулгазы – тыва дылды долу ажыглаарын чедип ап, ажы-төлдүң төрээн дылын чидирип бар чыдарын доктаадып, төрээн дылынга өөренир байдалдарны катап тургузары болур. Документини тыва дылдың ниитилелге ажыглалын калбартыр, ооң эрге-байдалын бедидер, дылдың нормаларын болгаш сөс кулавыр фондузун кадагалап база хөгжүдер, ол ышкаш тыва-орус болгаш орус-тыва ийи дылдың дең эргелиин хевирлеп база хөгжүдер сорулгалыг тургускан.

Предыдущая запись
ЦОПП позволит гражданам Тувы получить дополнительное профессиональное образование по рабочим специальностям
Следующая запись
Министерство сельского хозяйства контролирует зимовку скота в Туве
Меню