Бай-Тайга кожуунда мобилизация штавының даргазы, кожуун чагырга даргазының оралакчызы Айдын Бартан сентябрь 29-туң хүнүнде чаңгыс чер-чурттугларын төлээлээн состав-биле мөөңнээшкин езугаар ТШО-че кыйгыртканнарга ужурашкан. Олар амгы үеде 55-ки даг-адыгжы бригадазында кожуундан кыйгырткан эр улузунга немей чылыг хептерни чедирип бергеннер. Оон аңгыда Бай-Тайга кожууннуң чонунуң чыгган таалыңнарын дамчыткан. Ооң иштинде эм-таң, бирги херек чүүлдер, аъш-чем кирген.
«Бистиң кожууннувустан төрээн черивисти камгалап чоруткан эр чонувус дүъш соонда Новосибирск хоорайның шериг кезектеринче үнүптер» — деп, ол бай-тайгажыларга дыңнаткан.
Бай-Тайга кожууннуң социал четкилерде албан езу арынында бижээн медээниң адаанда чаңгыс чер-чурттуглары тыва дайынчыларга чедиишкиннерни, тиилелгени, онча-менди чанып кээрин күзеп турар.
