«Бөгүн Тыва Республиканың ыдык күрүне демдээ болур Тываның Тугунуң хүнүн демдеглеп турар бис. Тываның тугунуң хүнү – чаңгыс чер чурттугларывыстың ажыл-ишчи чедиишкиннериниң болгаш маадырлыг чоруктарынга мөгейигни илередип, чуртувустуң эрткен төөгүзүнге хүндүткелди, келир үеде ооң сайзыралынга бүзүреливисти күштелдирип, Төрээн черинге кызыгаар чок ынак, ону хүндүлээр кижилерни каттыштырып турар.
Тываның хүнүнге тураскааткан хүннү тускай тургузарының дугайында саналда аныяктар киирген. Ол дээрге-ле аныяк-өскенниң патриотчу чоруун, Тывазы дээш чоргааралды база республиканы ам-даа хөгжүдеринге, төрээн чериниң сайзыралы дээш боттарының күжүн, салым-чаяанын киириштиреринге беленин чугаалап турар. Байырлал-биле, эргим чаңгыс чер-чурттугларым! » — деп, ол бодунуң блогунда бижээн.
Алена Нан-Хоо белеткээн.
