РФ-тиң чанында Шүүгү департаментизиниң дыңнадып турары-биле алырга, декабрь айда шүүгү талазы-биле албан черлериниң төлээлери база парлалга ажылдакчылары-биле онлайн-ужуражылга болуп эрткен. Аңаа «Всероссийское студенческое патриотическое движение» деп аттыг чаа төлевилелдиң боттанып эгелээнин чугаалашкан. Ук төлевилел езугаар шүүгү органнарының баазазынга патриотчу, өөредиглиг, эртем база профугланыышкынныг хемчеглерни чорудары көрдүнген.

Төлевилелдиң иштинде Москва хоорайга элээн каш хемчеглер болуп эрткен. Оларның аразында «Московский комсомолец» солуннуң тайылбырлакчызы, эрге-хоойлу камгалакчызы Е.М. Меркачева-биле чогаадыкчы ужуражылга бар. Оон аңгыда янзы-бүрү чергениң судтарынче экскурсияларны келир үениң юристерин белеткээр сорулга-биле чоруткан. Студентилерге болгаш аныяктарга мастер-класстарны эрттирген болгаш, «Судебная власть в условиях новых вызовов» бүгү Россияның студентилериниң эртем-практиктиг конференциязын организастаан.

Регионнарның төлээлерин ук төлевилелге идепкейлиг киириштирип, ону чыл санында эрттирерин организаторлар планнап турар.

«Чыл санын уттундурбас хүннерге тураскаадып, төлевилелдерни боттандырар дугайында эки санал бар, ол суд системазының амыдыралындан чугула болуушкуннар азы чурттуң хамаатыларынга, федералдыг деңнелде боттанып турар кол-кол айтырыгларга, программаларга-даа хамааржып болур. Шак ынчалдыр Ада-чурттуң Улуг дайынының (1941-1945 ч.) Тиилелгезиниң 80 чыл ою болур. Студентилерге тематиктиг экспозициялар, судтарның, регионалдыг суд системазының музейлеринче экскурсияларны планнаан» — деп, оргкомитеттиң төлээлери таныштырган.

Мира КОНГУЛ-ООЛ
Чурукту Интернеттен алган