Тываның ном үндүрер чериниң үндүргени Б.К. Ондарның «Тываның черлер аттарының географтыг словары» база И.У. Самбуунуң «Тыва улусчу оюннар» деп номнары Россияның ном үндүрүкчүлериниң ассоциациязының «Чылдың тергиин номнары» деп бүгү-российжиг мөөрейиниң түңнелдери-биле Россияда ТОП-50 тергиин регион үндүрүлгелериниң санынче кирген. Кызыл шөлге эрткен XI Ном фестивалының кыска допчулалынче «Тываның черлер аттарының географтыг словары» («Тываның топонимиктиг словары») кирип, профессионал мөөрейниң дипломнарынга төептиг болган. Тываның Баштыңы Владислав Ховалыг тургустунганындан бээр 95 чыл оюн бо чылын демдеглеп турар ном үндүрер черниң чедиишкинниг ажылын демдеглээн.
«Бо чедиишкиннер – Юрий Кюнзегеш аттыг Тываның ном үндүрер черниң кызымаккай ажылының түңнели-дир» — деп, Владислав Ховалыг бодунуң блогунда демдеглээн.
Кол редактор Н.Ш. Куулар, үндүрүлгениң редактору Ш.Ш. Монгуш, өрүкчү Ч.М. Бегзи, дизайнер И.В. Принцев, техниктиг редактор В.Ч. Ховалыг словарьны парлалгаже белеткээн. А.А. Тюлюшның чуруу ооң даштын каастаан.
2014 чылда темалыг номинацияларга үнген эки номнарны Россияның Ном үндүрүкчүлериниң Ассоциациязының (АСКИ) профессионал эксперт чөвүлели шилээн. АСКИ-же чоруткан азы парлалгага үнген рецензияларны, библиотеканың, специалистерниң, номчукчуларның үнелелдерин үнелдерин көрүп, номнарны өөрени көөр. Мөөрейге «Тываның топонимиктиг словары» ийи номинацияга үнелелди алган, а И. Самбунуң «Тыва улусчу оюннар» деп ному демдегттинген.
АСКИ Литературлуг аалчылар бажыңынга (ГУМ-да) “Кызыл шөл” деп российжи эң улуг ном фестивалының «Чылдың тергиин номнары» мөөрейиниң тиилекчилерин чарлап, шаңнаар езулалды эрттирген. Бүгү чурттуң ном үндүрер черлериниң профессионалдары аңаа чыылган.
«Чылдың тергиин номнары» деп бүгү-российжи мөөрей ном үндүрер черлерниң профессионал арга-дуржулгазының өзүлдезинге идигни берип, эң-не эки ажылдарны болгаш парлалга программаларын тодарадып база нептередип турар.
АСКИ-ден аңгыда, Россияның Камгалал яамызы, ХКД херектериниң талазы-биле федералдыг агентилел, Националдар херектериниң талазы-биле федералдыг агентилел, «Орус делегей» фондузу, Россияның библиотекалаар ассоциациязы, Орус шериг-төөгү ниитилели, Хамаарышпас күрүнелерниң ном тарадыкчыларының ассоциациязы, Россияның Журналистер эвилели, Россияның Чогаалчылар эвилели, Орус Православ хүрээзиниң Ном үндүрер чөвүлели, Россия Федерациязының Садыг-үлетпүр палатазы, Москваның Чазааның массалыг информация чепсектери болгаш реклама департаментизи болгаш өске-даа черлер фестиавльдың деткикчилери болган.
Сөөлгү чылдарда Тываның ном үндүрер чериниң элээн каш төлевилелдери: Б.Будуптуң ийи дылда «Тыва чоннуң үлегер домактары болгаш тывызыктары», Г.Курбатскийниң «Тыва тывызыктары», «Шериг тоолдары», «Тыва. Болуушкуннар, фактылар, чоннар» деп фотоальбому Кызыл шөлде фестивальдың тулган номнар даңзыынче кирген.
