Октябрь айның эгези кезээде Башкының хүнү-биле харылзаалыг. Бо байырлал бүдүн чурттуң барык кижи бүрүзүнге эң-не чылыг болгаш сагыш-сеткилди доюлдуруп кээр. Чүге дизе бистиң шуптувустуң чуртталгада четтиргенивисти илередип, чоргаарланып чоруурувус ынак башкывыс бар.
Меңээ Башкының хүнү – онзагай хүн. Ол мээң ачам – башкы болгаш школа директору-биле дорт харылзаалыг. Ынчангаш мен башкы кижиниң ажыл-ижин дыка эки билир мен. Башкының ажылы — чүгле чогаадыкчы болгаш тургузукчу эвес, а берге болгаш харыысалгалыг.
Хүндүлүг башкылар, кижизидикчилер, башкылал ажыл-чорудулгазының хоочуннары, Тываның келир үези силерниң амыр эвес, ынчалза-даа мөзү-шынарлыг ажыл-ижиңерден хамааржыр дээр болза, хөөредиг болбас. Силер быжыг билиг бээринден аңгыда, республикавыстың сайзыралы дээш харыысалганы боттарынче алыр аныяк салгалдың делегейже көрүүшкүнүн хевирлеп турар силер.
Байырлал-биле, эргим башкылар! Аас-кежикти, профессионал болгаш чогаадыкчы чедиишкиннерни, чаагай чорукту күзедим деп, Тываның Баштыңы Владислав Ховалыг бодунуң блогунда башкыларга байыр чедирген.
