2024 чылдың ноябрь 13-те РФ-тиң Президентизиниң Сибирь федералдыг округда бүрүн эргелиг төлээзи Анатолий Серышев Новосибирск облазының кол мурнакчы үлетпүр бүдүрүлгелеринге барып четкен.
Бүрүн эргелиг төлээ Бердскиде эмчилер хеви болгаш хууда камгалал чүүлдери бүдүрүп турар чуртта эң улуг бүдүрүлге – «Здравмедтех – Новосибирск» КХН-ге барып чораан. Бүдүрүлгениң чиңгине директору Алексей Клевасов-биле ужурашкаш, чурттар аразында кады ажылдажылганы кедизинде хөгжүдериниң база ону калбартырының планынче кичээнгейни углаан.
2003 чылда үндезилеттинген компания регионда үш бүдүрүлге шөлдерлиг – Бердскиде, Татарскда база Чулымда, ол ышкаш Узбекистанда. Организацияда шупту 400 ажыг кижи ажылдап турар. Бүдүрүлге чорудуунда амгы үениң дериг-херекселдерин ажыглап, чаа технологияларны кииргени — ажылдың дээштиин болгаш продукцияның шынарын бедиткен. Эмчи ажылдакчыларынга таарымчалыг болгаш оларның камгалалын хандырар чаңгыс катап ажыглаар хептер база иштики хептер радиациялыг стерилизацияны эртер, кезиишкин эрткен аарыг кижилерге айыылды тургуспас.
Коронавирус инфекциязы нептерээн үеде Сибирь регионнарында эмчилерниң ажылынга дуза чедирери-биле организацияның күчү-шыдалын ажыглаан. Бөгүн компания бодунуң продукциязын тускай шериг операциязының зоназында дайынчыларга дуза көргүзеринге ажыглаар кылдыр дамчыдып берип турар.
«Бедик технологиялыг бүдүрүлгениң саң-хөө көргүзүглери эки, Сибирь база оон өске регионнарга херек продукцияны бүдүрүп турар. Эмнелге албан черлери-биле сырый ажылдап, эрге-чагырга органнарындан деткимчени алганындан, мында езулуг ажыктыг төп тургустунган-дыр. Бүдүрүлгениң удуртулгазы мурнунда улуг сорулгаларын чедип алыр дээрзинге бүзүрээр мен» – деп, күрүне баштыңының бүрүн эргелиг төлээзи Анатолий Серышев чугаалаан.
Бүрүн эргелиг төлээ оон аңгыда Искитим хоорайда «Новосибирскиниң кылымал удазын заводу» АН-га чедип, бүдүрүлгениң эде чаартылга төлевилелдери кайы хире чоруп турарын көрген.
Анатолий Серышев камгалал адырының бүдүрүлгелеринче доктаамал үнүп, заводтарның удуртулгазы-биле ужуражып турар. Ындыг ужуражылгалар үезинде күрүнениң камгалал чагыглары кайы хире күүсеттингенин, айтырыглар бар болза ону шиитпирлээринге дузалажып турар.
Россия Федерациязының Президентизиниң 2023 чылдың май 23-те “Россия Федерациязының Шериг-үлетпүр комплекизиниң база федералдыг округтарда Россия Федерациязының Президентизиниң бүрүн эргелиг төлээлериниң кады ажылдажылгазының чамдык айтырыгларының дугайында” № 390 чарлыында айыттынган сорулгаларны боттандырар ажылчын бөлүктүң хуралдары-биле камгалал-үлетпүр комплекизиниң инвестиция төлевилелдерин, курлавыр болгаш кадр хандырылгазын боттандырар системалыг ажыл чоруп турар. Ажылчын бөлүкте Сибирь федералдыг округда субъектилер баштыңнары, Россия Федерациязының Үлетпүр болгаш садыг яамызының тускай угланыышкынныг департаментилер, эрге-хоойлу камгалаар болгаш контроль органнарының удуртукчулары, бүдүрүлгелерниң удуртукчулары болгаш кол федералдыг инспекторлар кирип турар.
