Бөгүн чазактың аппарат хуралынга Тываның Баштыңы Шолбан Кара-оол удуртукчуларга Шагаа байырлалының хемчеглеринге эки киришкени дээш четтиргенин илереткен. Чөөн-Хемчик кожууннуң аныяк эмчилер чөвүлелиниң кежигүннери хөкей шөлдерин кылган болгаш, ону байырлыг байдалга хүлээткен. Ол дугайында Тываның Баштыңы Шолбан Кара-оол демдеглеп чугаалааш, кожууннуң чагырыкчызы Алексей Тюлюш-биле дорт харылзаага чугаалашкан.
Алексей Тюлюш, Чөөн-Хемчик кожууннуң чагырыкчызы: — Ийе, аныяк эмчилерге хөкей шөлү дээш четтиргенивисти илередип тур бис. Кадык камгалал яамызының оралакчы сайыды Алла Намдак бистиң-биле харылзажып, аныяк-өскенге спортчу хөкей шөлчүгежин кылыр дээнин дыңнаткан турган.
Шагаа байырлалы бистиң кожуунга эки эрткен. Аът чарыжы эрттирер черивиске өглер хоорайжыгажын кылдывыс. Бо удаада кожуунга Шагааны ондарларның төрел-бөлүү уштап-баштаан. Оон аңгыда бүдүү айында кураторувус-биле малчыннар коданнарже үнүүшкүннерни кылдывыс.