Бо хүн Айдыс Александрович Сатты ТР-ниң Чазааның Даргазының оралакчызы – экономика сайыды эрге-дужаалга томуйлаан.
Айдыс Сат 1987 чылда Туран хоорайга төрүттүнген. 2009 чылда РФ-тиң Чазааның чанында Саң-хөө академиязын «Бухгалтер учеду, анализ болгаш аудит» деп мергежилдиг доозуп келген. 2008-2009 чылдарда Москва хоорайга «Эрнст энд Янг» организацияга аудит ачы-дуза килдизиниң специализи кылдыр ажылдап турган.
2009-2010 чылдарда шериг албан-хүлээлгезин эрттирген.
2011 чылдың январь айдан 2013 чылдың январь айга чедир ТР-ниң Экономика яамызынга күрүне программалары болгаш инвестициялар хаара тудар килдистиң специализи бооп ажылдаан. 2013 чылдың дургузунда «Харылзаа-Банкызының» Тывада салбырынга кол специалист бооп ажылдап турган. 2013 чылдың декабрь айдан 2016 чылдың март айга чедир «Россельхозбанкының» Тывада салбырынга кол эксперт кылдыр ажылдаан.
Дараазында чылдарда ТР-ниң Экономика яамызының оралакчы сайыды база бирги оралакчы сайыды эрге-дужаалдарга ажылдаан.
«Айдыс Александровичиде чугула ведомстволарның бирээзи — Россияның инвестициялыг хөгжүлдези агентилелге ажылдаан арга-дуржулга бар. Ол чаа-чаа механизмнерни билир, республикавыстың хөгжүлдезинге чаа шиитпирлерни саналдаары чугаажок. Улуг сорулгалар салбайн тур мен. Бичиилеп бурунгаарлаар — баштай Тываның көргүзүглерин Сибирь иштинге көдүрүп алыр, ооң соонда чурт иштинге база. Чаа удуртукчуга чедиишкиннерни база экономика яамызының коллективинге чону дээш үре-түңнелдиг ажылды күзедим» — деп, Владислав Ховалыг чугаалаан.
#зампред_тувы #минэк_тувы #министр #назначение #врио_главы_тувы #айдыс_сат #молодежь_тувы #тыванын_аныяктары
