Бо чылын Тыва Республика «Амыдыралга инфраструктура» национал төлевилелче кирип турар «Хөй-ниити транспортунуң хөгжүлдези» федералдыг төлевилелге бир дугаар киржип, хөй-ниити транспортунуң автопарыгын чаартыр. Тываның Баштыңы Владислав Ховалыг национал төлевилелдиң шимчеп чоруур хөй-ниити транспортунуң составын чаартыр тускай көргүзүглерин 2030 чылга чедир чедип алыры-биле, чаа автобустар үлүүн 85 хуу чедир көвүдедир даалганы регионалдыг Орук-транспорт комплекизиниң яамызынга берген.
Республика Баштыңының даалгазын күүседири-биле, Тываның орук-транспорт яамызы 2022 чылдан эгелеп автопаркты болгаш Кызыл чоок-кавызында хөй-ниитиниң пассажирлер аргыштырар бүгү системазын чаартыр ажылдарны план езугаар чорудуп турар. Владислав Ховалыгның деткимчези-биле 2022 чылдан 2024 чылга чедир 56 автобусту садып ап, сөөлгү он-он чылдарда чорбайн турган муниципалдар аразында пассажирлер аргыштырылгазын бир дугаар катап эгелээн.
Ажаалга банкызының лизинг чээлизи-биле садып алган «Ютонг» деп маркалыг сес улуг автобустары амгы үеде үш угланыышкында кожууннар болгаш хоорайлар аразының маршруттарында пассажирлерни аргыштырып турар.
«Чедингир хүрээлең» системазының тускай дериг-херексел-биле чепсеглээн 48 автобузунуң 30-и шимчээшкини кызыгаарлыг хамаатыларны хоорай чоогунуң 6 маршрудунда аай-дедир аргыштырып турар.
Бо хемчеглер 2025 чылдың төнчүзүнге чедир хөй-ниити транспортун 60 хуу чедир чаарткан.
«Хөй-ниити транспортун хөгжүдери» федералдыг төлевилелге киржир негелделер езугаар, бир эвес боттарының кады акшаландырыышкыны бар болза, регионнарга шимчеп чоруур состав өртээнге субсидияларны берип турар. Тыва бо негелделер езугаар бо чылын сес автобусту садып алыр аргалыг.
