Тыва өг-бүлелерниң хууда дузалал ажыл-агыйларын деткиир болгаш республиканы эки шынарлыг картошка-биле хандырар сорулгалыг «Өг-бүлениң шыгжамыры» социал төлевилелге киржип турар. Бо чылын төлевилелдиң акшаландырыышкынын эрткен чылга деңнээрге дөрт катап хөй, азы 5,6 млн. рубль чедир улгаттырган.

Тываның Баштыңы Владислав Ховалыг төлевилелдиң үре-түңнелдерин дыңнаткан: «Бо чылын төлевилел 200 ажыг өг-бүлени, ооң иштинде тускай шериг операциязының киржикчилерин база 24 арат ажыл-агыйларны хаара туткан. Хөй кезиинде суггаттыг участоктарга дээш, 112,2 гектар черге картошканы тараан. Черлерни аңгылап, довураан белеткеп, херек курлавырлар – кывар-чаар чүүлдер, картошка болгаш ногаа үрезиннери-биле дузаны каткан. Гектардан-на ортумаа-биле 82,1 центнер картошканы ажаап, эки дүжүт алдынган» — деп, ол бодунуң блогунда бижээн.

Бо хүннерде Барыын-Хемчик, Таңды, Чаа-Хөл кожууннарда картошка ажаалдазы доозулган. Ниитизи-биле 22,9 га черден 187,94 тонна картошканы ажаап алган, ол планнаттынган дүжүттүң 20,4 хуузу болур. Гектардан ортумаа-биле 82,1 центнер дүжүттү ажаап алдынган. Бай-Тайга кожуунда дүжүт ажаалдазы уламчылавышаан. Төлевилел киржикчилериниң аразында рекорд тургусканнар база бар. Чижээлээрге, Мөңге Мөңгүн-Даш Мачакович 9 гектарга 16,5 тонна үрезинни олурткаш, 94,5 тонна картошканы, азы бир гектардан-на 105 центнер чаагай дүжүттү ажаап алган. Бо чижек төлевилелдиң өске киржикчилерни сорук киирип, бедик дүжүттү алырынче чүткүдүп турар.

«Өг-бүлениң шыгжамыры» төлевилел уламчылап турары-биле, сезон төнчүзүнге чедир картошканың ниити дүжүдү элээн көвүдеп, Тываның көдээ чурттакчыларынга боттуг күрүне деткимчезин көргүзүп, шынарлыг аъш-чем хандырылгазынга улуг үлүг-хуузун киирер.

Төлевилел чүгле республиканың чурттакчы чонун картошка-биле хандырар эвес, а хууда дузалал ажыл-агыйларын хөгжүдүп, өг-бүлеге орулганың немелде дөстерин тып, көдээ суурларның экономиказын быжыглаар.