Улуг-Хем кожууннуң Торгалыг суурга 176 олуттуг чаа школаның тудуу эгелээр. Ол спортчу залдыг болур. Тываның Баштыңы Владислав Ховалыг Улуг-Хем кожуунче ажыл-агыйжы үнүүшкүнүнүң үезинде ол дугайында чугаалаан. Тудуг ажылын эртежик эгелээри-биле, белен төлевилелдерни ажыглаарын Тываның Баштыңы дааскан.
27,2 муң квадрат метр хемчээлдиг школаның турар чериниң участогу тодараттынган. Ону эрги школаның чанынга тудары планнаттынган.
«Мээң бодалым-биле алырга, ол чедимчелиг вариант болур. Чүге дизе эрги школа суурнуң ортузунда турар. Чаа школаның тудуунуң үезинде уругларның үзүктел чок өөредилгезин хандырары чугула. Тудугну бо чылын эгелээш, ийи чыл дургузунда доозуптар деп планнап турар бис» — деп, Владислав Ховалыг демдеглээн.
Чаңгыс аай хевирниң төлевилели езугаар республикада элээн каш школалар туттунган. Ол төлевилел-дөзевилел ажылдарынга бюджет акшазын камнап алырынга дузалыг болгаш, тудугну эрте эгелээринге идигни бээр. Торгалыг суурга ооң мурнунда ол-ла кожууннуң Чодураа суурунга туттунган школаның төлевилелин ажыглаары көрдүнүп турар.
Суурнуң амгы үеде школазы 1929 чылдан бээр чоорту туттунуп эгелээн болгаш, кол корпузу 1963 чылда доозулганын сагындыраал.
