Бии-Хем кожууннуң сесерлиг сумузунда «Сорунза» губернатор төлевилели езугаар культура бажыңының тудуун эгелээн.
Амгы үеде суурда аварийлиг байдалда, соок, караңгы, кижилерниң кадыкшылынга айыылды тургузуп болур оран-сава бар. Ынчангаш сесерлигжилерниң бир дугаар чагыы – чаа клубту тудары.
Көдээ суурларга культура одаа хөгжүлдениң база бир кол чери болбас арга чок. Сесерлигжилер чоннуң туудунга киржирин изиг күзелдии-биле илереткен. Төлевилел езугаар тудуг материалдарын Тываның культура болгаш туризм яамызы садар, а тудуг ажылдарын чурттакчылар боттары кылыр. Культура бажыңы үлегер-төлевилел езугаар 120 олуттуг 243 кв.м. болур.

Амгы үеде тудугнуң белеткел ажылдары эгелээн, оран-саваның таваан кудуп турар. Тудуг бригадазынче кожууннуң культура ажылдакчылары болгаш Сесерлиг суурнуң чурттакчылары кирген.

Бии-Хемниң медээзинден Мира КОНГУЛ-ООЛ белеткээн.
#Сорунза #губернаторскиепроекты #Тыва #Тува