Улуг-Хем кожууннуң девискээринде көдээ суурларже мобилдиг ФАП-тар чурттакчыларга диспансериязация эрттирери-биле база чонга тарылганы чорудары-биле үнүүшкүннерни «Кадык камгалалы» национал төлевилел езугаар кылып турар. Ниитизи-биле республикага 18 мобилдиг ФАП-тар келгенин сагындыраал. «Газель» болгаш «Соболь» автомашиналарда мобилдиг маммографияны база Камаз автомашинада ФГ-аппараттарны кошкан.

Национал төлевилел езугаар Арыскан, Чодураа, Торгалыг, Арыг-Үзүү, Иштии-Хем, Арыг-Бажы, Ийи-Тал суурларже үнүүшкүннерни организастаан. 174 чурттакчы эмчи хыналдазын эрткен түңнелинде, фтизиатр 2 кижиге улаштыр эмчилээри-биле шынзылганы берген. Үнүүшкүннер үезинде 25 кижи тарылганы алган, оларның аразында 60 хардан өрү назылыг 12 кижи бар.
Диспансерлиг эмчи хыналдазын 25 кижи эртип алган, ханы диспансеризацияны 17 кижи эрткен. 20 кижи спирографияны чоруткан, 6 кижи ЭКГ-ни эрткен.

«Мобилдиг ФАП-тарда чылыдылга системазы бистиң соок кыштарывыска таарымчалыг-дыр. Оон аңгыда ФАП-тар гинекологтуг кресло, чигир хынаар херекселдер, деңзилер, мага-боттуң узунун хынаар херексел, тонометр, стетоскоп-биле дериттинген» — деп, Улуг-Хем кожууннуң төп эмнелгезиниң кол эмчизи Лариса Куулар дыңнаткан.

#нацпроект #кадыкшыл #кожууннар #үнүүшкүннер #улугхем #тыванын_аныяктары