Чоокта чаа Тываның Баштыңы Владислав Ховалыг Эрзин кожуунче ажылчын үнүүшкүнүнүң үезинде оруктарның септелгезин хынаан. Ол дугайында регионнуң удуртукчузу бодунуң блогунда дыңнаткан.
«Көдээ суурларга орук инфраструктуразының хөгжүлдези» федералдыг төлевилелдиң «Көдээ суурларның комплектиг хөгжүлдези» күрүне программа езугаар Эрзин кожууннуң Булуң-Бажы суурнуң оруктарының септелгезин кылдынып турар.
Септелге ажылдары ийи чадага боттаныр: бо чылда ажылдың чартыын доозар, төлевиледи бүрүнү-биле 2026 чылда төндүрер. Суурже кирер оруктуң узуну – 4,738 км, кол кудумчу — 1,315 км. Амгы үеде чер ажылдарын дооскан. 1,6 км орукту асфальтылаан.
Төлевилел боттанган соонда орук айыыл чок болгаш аргыжарынга таарымчалыг болур. Көдээ суурларның оруктарын экижидер болгаш айыыл чок болдурар ажылды ам-даа уламчылаар бис» — деп, ол демдеглээн.
Мира КОНГУЛ-ООЛ белеткээн.
Чуруктарны В. Ховалыгның социал четкилерде арынындан алган
