Тывада «Өөредилгениң школа системазын чаартыры» программа 3 дугаар чыл ажылдап турар. Ук программа езугаар сентябрь 1-ге чедир 46 көдээ школаларның септелгези чоруттунар. Тываның Баштыңы Владислав Ховалыг чоокку хүннерде Чөөн-Хемчик база Бай-Тайга кожууннарда өөредилге албан черлериниң капитал септелгезиниң талазы-биле ажылчын үнүүшкүннү кылган. Ол дугайында ТР-ниң Өөредилге яамызының сайыды Елена Хардикова бодунуң блогунда тайылбырлаан.
«Чоокку хүннерде Чөөн-Хемчик, Бай-Тайга кожууннарның школаларының капитал септелгезиниң талазы-биле ажылдадывыс. Объектилерге Тываның Баштыңы Владислав Ховалыг чедип, септелге ажылдарын хынаан.
Бо школаларда капитал септелге апрель айда эгелээн болгаш, август айның ортан үезинде төнер ужурлуг. Ийи школаның кайызында-даа шалаларын болгаш соңгаларын солаан, иштики ажылдарын кылып турар. Оран-саваларны эде кылганы-биле, санитар өрээлдер база хуралдаар залдар, аъш-чем өрээлдери немешкен. Чылыдылга системазын болгаш суг хандырылгазын солуур ажылдар чоруп турар. Крышаларын чаарткан. Дериг-херекселдерин болгаш эт-септи чагыткан бис. Чоокку үеде кээр. Подрядчиктер керээниң хуусаазын сагыыр ужурлуг. Бо айтырыгны хүн бүрүнүң хыналдазында алган мен» — деп, өөредилге сайыды Елена Хардикова демдеглээн.
Оон аңгыда Хөндергей суурда уруглар садынга четкеш, ук оран-саваны назы четпээннерниң албан черлериниң капитал септелгезин чорудар программаже киирерин сайыт сүмелээн. Уруглар садының эргелекчизинге төлевилел-смета документилерин канчаар белеткээриниң дугайында практиктиг сүмелерни берген. Суурда 100 ажыг уруг садче барып турар, оларга таарымчалыг байдалдарны тургузары чугула.
