Бо хүн Кызыл кожууннуң Ээрбек сумузунда чаа фельдшер-акушер пунктузун байырлыг байдалга ажыткан.
Байырлыг хемчегге ТР-ниң Дээди Хуралының даргазы Каң-оол Даваа сумунуң чурттакчы чонунга байырын чедирген. Кызыл кожаа кестинген соонда, үр чылдарда ажылдап турар хоочун эмчилерни Хүндүлел бижиктер-биле шаңнап-мактааш, чонга солун концертти бараалгаткан.
«Кадык камгалал» национал төлевилел езугаар объектини амгы үениң негелделеринге бүрүнү-биле дүгжүп турар дериг-херекселдерни салган.
«Медицина ажылдакчыларының хүнүн уткуштур биске дыка улуг белек — чаа эмнелгевис ажыттынган. Ооң мурнунда чаңгыс бичии өрээлге сыңчып алгаш ажылдап турган болзувусса, ам эмчи бүрүзү аңгы-аңгы чылыг, чырык өрээлдерлиг апарган бис. Национал төлевилел дузазы-биле чаа эмнелгелер ажыттынып турары дыка эки деп санаар мен»-деп, сумунуң эмчизи Елена Михайловна чугаалаан.
Кижилерниң кадыын, амы-тынын камгалаар буянныг ишти шилип алган ак халаттыг Маадырларывыска профессионал байырлалын таварыштыр каң дег кадыкшылды, быжыг тура-сорукту, хей-аъды бедик болурун күзедивис!
#нацпроект #кадыккамгалалы #здравоохранение #тыванын_аныяктары
Эрес Монгуштуң тырттырган чуруу.