«Өөредилге» национал төлевилелдиң «Уруг бүрүзүнүң чедиишкини» федералдыг төлевилел езугаар Черби суурда школа-интернаттың өөреникчилеринге күш-культура болгаш спорт кичээлин эрттирер спортчу шөлчүгешти чаа дериг-херексел-биле чүмнээн. Ол дугайында Тываның Баштыңы Владислав Ховалыг бодунуң блогунда бижээн.

«Президентиниң «Өөредилге» национал төлевилелиниң «Уруг бүрүзүнүң чедиишкини» федералдыг төлевилели езугаар Тываның школаларының дериг-херекселдерин чаартыр ажылды уламчылап турар бис. Бо хүннерде 8 школаның спортчу клубтарының чаа дериг-херекселдери келген, оон аңгыда 5 школада чаа спортчу шөлдерни тургускан.
Программаны амыдыралга боттандырып эгелээнден бээр 160 школа чанының спортчу клубтарын тургускан, оларның 130-и республиканың көдээ суурларында. Чижээлээрге, Ырбанда хөккей шөлүн дерээн, а чурукта баскетбол болгаш ойнаар спортчу шөлдерлиг Чербиниң школа-интернады-дыр.
Ниитизи-биле 23 муң өөреникчини хаара туткан. Олар 850 аңгы секция-бөлгүмнерде спорттуң 28 хевиринде хаара туттунган» — Тываның Баштыңы Владислав Ховалыг демдеглээн.

Бо удаада Чербиниң школа-интернадының спортчу шөлүнде баскетбол щиттерин, хол бөмбүүнүң четкизин азар баганаларны, бут бөмбүүнүң хаалгаларын база турниктерни быжыглаан. Уруглар ында идепкейлии-биле ойнап, сула шимчээшкиннерни кылып турар.

Амгы үеде школа-интернатта кадыкшылының аайы-биле харык-шинээ кызыгаарлыг 70 өөреникчи бар. Өөредилге албан чери тайга-сын, хем-суг долганган экологтуг арыг черде турарын сагындыраал.