Тываның Баштыңы Владислав Ховалыг апрель 1-де республиканың девискээринде алды школаның капитал септелгези эгелээнин бодунуң блогунда бижээн. Ол дээрге Кызыл кожууннуң Сукпак суурунда Борбак-оол Араптан аттыг школа, Чеди-Хөлдүң Хову-Аксында, Тес-Хемниң Чыргаландыда, Сүт-Хөлдүң Бора-Тайгада, Барыын-Хемчиктиң Аксы-Барлык база Бай-Тайганың Кызыл-Даг суурунда школалар болур. Тудуг ажылдарының керээзи ниитизи-биле 300 сая рубль чеде бээр.

«Кызыл-Даг суурнуң школазында бузар ажылдар эгелей берген. Шупту школалар өөредилге ажыл-чорудулгазын өске оран-саваларже көжүрген. Кожууннарның чагырга даргаларынга херек апарган үелерде өөреникчилерни школалардан дажыыр ажылды организастаарын даастым» — деп, Тываның Баштыңы демдеглээн.

Ол ышкаш харыысалгалыг ведомстволар тудуг объектилеринге кураторларны тодарадыр.

«Септелге ажылдары чаа-ла эгелээн-даа болза, апрель айның ортан үезинде школаларның дериг-херекселдеринге хамаарыштыр чагыгларны тургузуп, ону чарладырын даастым. Оон аңгыда Балгазынның агробүдүрүлге техникуму капитал септелгеге белеткенип турарлар, оларның өөредилге корпузун болгаш хөй-ниити чуртталга бажыңнарының ийи корпузунуң септелгезин «Аныяктар болгаш уруглар» национал төлевилелдиң иштинде «Профессионалитет» федералдыг төлевилел езугаар кылыр» — деп, Владислав Ховалыг түңнээн.

#нацпроекты_минобррт

3

Оценили 3 человека