Англи болгаш төрээн дыл башкызы Сайдаш Таскый 2023 чылда төлевилелдиң киржикчизи болуп, бодунуң башкылаашкын ажыл-чорудулгазын Шагаан-Арыг хоорайның 2 дугаар школазынга эгелээн.
Аныяк башкы төлевилел ооң профессионал өзүлдезинге немелде курлавырларны бергенин демдеглээн. Билдингир башкыларның мастер-класстары, тренингилер болгаш вебинарлары амгы үениң өөредилге технологияларынга база башкылаашкынның психологтуг талазынга тураскааттынган.
«Эрткен өөредилге чылында мергежилимче быжыг кирдим. Бир дугаар өөредилге чылында чаңчыгып, чаа чүүлдерге өөренип турган болзумза, ам бодумда бүзүрел быжыккан. Ам кичээлди канчаар үре-түңнелдиг тургузарын билир мен: өөреникчилер-биле аразынга бүзүрелдиг байдалды болгаш эң-не шимченгир аудиторияның кичээнгейин хаара тудары дээн ышкаш» — деп, Сайдаш Шолбанович чугаалаан.
Ол бодунуң өөреникчилериниң чедиишкиннеринге өөрүп, чоргаарланып чоруур: «Клазывыста оолдар, уруглар сагыш-сеткил-даа, угаан-медерел-даа талазы-биле өзүп келген. Өөреникчилер сайгарылгаларда идепкейлиг киржип, бердинген онаалгаларны шиитпирлээринге идепкейлиг апарган. Уругларның эртем-билиинде депшилгени эскерип, олар дээш өөрүп турар мен» — деп демдеглээн.
Мергежилиниң аайы-биле шынарлары болгаш характери тургустунарынга дагдыныкчылар чугула үлүг-хуузун киирип турарын аныяк башкы демдеглээн. Ол сеткилиниң ханызындан төрээн дыл башкылары Вера Доржуевна Базыр-Сады, Чойгана Васильевна Ажы база англи дыл башкызы Сайзана Крылововна Дензинге четтиргенин илередип турар. Ол ышкаш ооң профессионал өзүлдезинге болгаш хууда шынарларынга улуг салдарны чедирген Ольга Борисовна Сендиге аныяк башкы тускай өөрүп четтирген.
«Оларның деткимчези болгаш мерген арга-сүмелери бергелерни ажып эртеринге, ажылымга эки үре-түңнелди чедип алырынга дузалаан» — деп, Сайдаш Таскый чугаалаан.
«Я-учитель»/ «Мен – башкы мен» төлевилел регионнуң өөредилге системазының хөгжүлдезинге кол рольду ойнап турар болгаш, школаларже аныяк кадрларны хаара тудары, өөреникчилерниң билииниң шынарын бедидеринге, аныяктарның чогаадыкчы арга-шинээн сайзырадырынга дузалаар. Ук төлевилелдиң ачызында аныяк башкыларның арга-шинээ илереттинип, регионнуң өөредилге адырының келир үезинче улуг үлүг-хуузун киирер аргалыг.
2025 чылда педагогика талазы-биле дээди өөредилге черлериниң доозукчулары «Я-учитель»/ «Мен – башкы мен» төлевилелче шилилде мөөрейге киржири-биле чагыгларны август 8-тен эгелээш дужаап болурун сагындыраал.
