Владивосток хоорайның Ыраккы чөөн чүк федералдыг университединде эки турачыларның округ шуулганы дүүн эгелээн. Ында Тайгана Монгуш, Чаян Ондар, Алина Дажы-Даваа, Эрес Дотпаа Тываны төлээлеп четкен.
Эки турачылар шуулганының бирги хүнүнде аныяктар ажыктыг программаларга киришкен. «Умка» дириг амытаннарга дузалаар фондунуң ажыл-чорудулгазы-биле танышкан. Ол ышкаш «Адмирал» хөккей клувунуң демнежилгези-биле тургустунган «Ачы-буянның аллеязын» сонуургаан.
«Эки турачылар шуулганының ажылын дыка сонуургап тур бис. Ачы-буян чедирип турар хөй-ниити организацияларындан аңгыда, кадыкшылының аайы-биле харык-шинээ кошкак уругларга мастер-класстарны эрттирген. Аңаа шуулганның шупту эки турачылары киришкен. Оон аңгыда бирги эмчи дузазын чедирер мастер-класс база эрткен» — деп, Тывада Аныяктар херектериниң талазы-биле агентилелдиң ажылдакчызы Тайгана Монгуш Ставропольдан дамчыткан.
