ТывКУ-нуң командазы «Евразия – арга-шинектер контингентизи» грант мөөрейин тиилээш, төлевилелин Россия болгаш Узбек, Казах, Кыргыз республикаларга Тываның аныяк даш-чонукчуларының «Оживший камень» делгелгезин организастаан. Ук төлевилел «Евразия» чоннарның кады ажылдажылгазын хөгжүдер автномнуг коммерцияга хамаарышпас организацияның деткимчези-биле боттанганын сагындыраал.

Бөгүн ТывКУ-нуң кол корпузунга аныяк даш чонукчуларының делгелгезин организастаан. Аңаа республиканың билдингир даш-чонукчулары, чурукчулары, төлевилелдиң киржикчилери келген. Чыглып келген аалчыларга дээди өөредилге чериниң ректорунуң мурнундан проректор Евгений Монгуш байыр чедирген. Ол ышкаш бүдүн чыл дургузунда кады ажылдажылганы үре-түңнелдиг чорудуп келген партнёрларынга Чаа чыл бүдүүзүнде байырны чедирип, Өөрүп четтириишкинниң бижиктерин тывыскан.

«Чыл дургузунда студентилеривистиң ажылдарының делгелгезин 3 аңгы чуртка таныштырып, делгелгезин организастаан бис. Оон аңгыда Россияга база. Төлевилелдиң удуртукчузу ТывКУ-нуң студентизи Элбек Оюн болган. Ооң төлевилели грантыны ойнап алган. Бо үе дургузунда кады ажылдаан партнёрларывысты бөгүн чалап, өөрүп четтиргенивисти илередип тур бис. Оларның аразында билдингир даш-чонукчулары, чурукчулар бар, ол ышкаш төлевилелди доктаамал чырыдып келген «Тываның аныяктары» солуннуң редакциязынга тускай өөрүп четтирдивис» — деп, төлевилелдиң эртем удуртукчузу, ТывКУ-нуң башкызы, химия кафедразының доцентизи, химиктиг эртемнер кандидады Ольга Кендиван чугаалаан.

Мира КОНГУЛ-ООЛ

Авторнуң чуруктары