Тывада бо чылын Масленица ай санаашкыны-биле Чаа чыл – Шагаа хонуктары-биле дакпырлажы берген. Ынчангаш ол ийи байырлалды чергелештир эрттирер.
Понедельникте Тывага, Россияның бүгү регионнарында ышкаш, Масленица неделязы азы Быштак чеди хонуу эгелээр. Ында чоннуң чаңчыл болур берген хөглээшкиннери хүн бүрүде тускай уткалыг болгаш ужур-езулалдарлыг болуп эртер. Бо үеде блины быжырып, хардан чуңгуу кылып, шанактыг бадар. А байырлалдың төнчүзүнде кыштың хоюткузун өрттедиптер.
Бо неделяда Тываның найысылалынга болгаш кожууннарынга Масленицага тураскааткан ийи чүс ажыг – хөглүг спортчу, өөредиглиг оюннар, аъш-чем садыглаашкыны дээш, өске-даа хемчеглер эртер.
Өвүр кожуун Масленица байырлалын онзагай кылдыр демдеглээр деп турар. И.Г. Сафьянов аттыг Орус культура төвүнүң артистери аңаа март 2-де культурлуг-хөглээшкин программазы-биле кожуун төвүнге кээр.
Тываның Баштыңының аппарат хуралынга Чазак Даргазының оралакчызы Айдын Чюдюктуң дыңнатканы-биле алырга, ындыг үнүүшкүннерни ыраккы суурларның чурттакчыларынга доктаамал чорудуп, чоннуң улуг байырлалдарын бедик деңнелге эрттиреринге идигни бээр ужурлуг. Кыдыг кызыгаар Өвүр кожууну бирги шенелде шөл болур.
Хандагайтыда кожуун чагыргазының чоогунда Аныяктар шөлүнге, «Орус өргээ» деп шөлү-биле «Делгем Масленица» деп театржыткан байырлал программаны организастаар. Көрүкчүлерни езулуг орус борщ, самовардан шайлыг чаагай блины-биле сонуургадыр. Байырлал кыштың хоюткузун өрттедир езулал-биле доостур.
Ол хүннерде республиканың шупту ном саңнарынга, культура бажыңнарынга болгаш одагларынга мөөрейлер, делгелгелер, аңгы-аңгы хемчеглер, мастер-класстар болгаш оюннар эртер. Тываның найысылалы Кызылда ном саңнары аас чогаал программаларынче база Масленицаның чаңчылчаан чыыштарынче чонну хаара тудар.
«Енисей» культура бажыңының болгаш хоорайның хөй-ниити хемчеглер төвүнүң интернет-курлавырларынга Масленица хүннериниң болгаш оларның ужур-утказының дугайында медээлерни, темалыг викторинаны эрттирер.
Улуг-хүнде, март 2-де, хоорайның чурттакчыларын болгаш аалчыларын Аныяктар сесерлиинге дүъште эгелээр чоннуң хөглээшкининче чалап турар. Аңаа «масленица сөңүнүң» улуг делгелгези болгаш чагы бажынче үнериниң мөөрейи болур. Программада кидис идиктер ажыр шураары, күш-шыдал көргүзүү дээш, оон-даа өске оюн-тоглаалар бар.
Масленица кыштан часкы үеже шилчилгени илередип турар ханы төөгүлүг. Орус күрүнеге христиан шажынны хүлээп алган соонда, Масленицаны хүрээ байырлалдарынче кирип, ону Быштак неделязы деп адап турган.#тмг
Чурукту социал четкилерден алган
