Чалыы назынның байырлалы-биле!

Патриотчу ажыл-ижи

Бо чылдың отчеттуг түңнелдери-биле алырга, Тывада баштайгыларның шимчээшкини ниитизи-биле 88 хемчегни организастаан. Оларның аразында 16 федералдыг төлевилел, 10 – парт­нёржу, 24 акция болгаш чаңгыс аай хемчеглерниң хүннери бар. Баштайгыларның төлевилелдери база янзы-бүрү хемчеглери республи­каның Өөредилге яамызының чаңгыс аай кижизидилге планынче кирген болгаш, өөредилге албан черлеринде күүсеттинип турар. Уругларның болгаш аныяктарның патриотчу кижизидилгезинче кол кичээнгейни углаан. Ооң иштинде ЛУР, ДУР-нуң уругларынга 1500 хире номну чыггаш чоруткан «Өңнүүмге ном» бүгү Россияның акциязы, «Камгалакчыга байырдан чедир», «Тиилелгениң классиказы», «Мээң Маадырым», «Тиилелгениң ырылары», «Тиилелгениң соңгалары», «Сактыышкынның сады» «Өлүм чок полк» дээш оон-даа өске улуг масштабтыг федералдыг төлевилелдерге он-он муң элээдилер, аныяк-өскен киришкен.

«Россияның хамаатылары бис!» федералдыг төлевилел доктаамал күүсеттинип, ТР-ниң ИХЯ-биле кады ажылдажылга езугаар янзы-бүрү байырлыг хемчег­лерге 300 ажыг өөреникчиге паспорттарны тывыскан. Бо төлевилелге киржир күзелдиглерден чагыглар хүн бүрүде кээр. «Төөгүнүң кадагалакчылары» база бир федералдыг төлевилелди төрээн чуртувустуң төөгүзүн сонуургаар уругларны болгаш аныяктарны каттыштырар, ону шинчилээр, улуг назылыгларга хүндүткелди сиңниктирер сорулга-биле эрткен чылдың сентябрь айдан бээр боттандырып турар.

2023 чылдың декабрь айда Тываның Национал музейинге «Төөгүнүң кадагалакчыларын ыдыктаар» байырлалды эрттирген. Аңаа шылгараан отрядтарга «Төөгүнүң кадагалакчылары» демдектерни тывыскан.
Кадагалакчылар кылдыр ыдыктаткан 80 ажыг школачылар улаштыр бодунуң суурунуң, хоорайының, чуртунуң төөгүзүн шинчилеп, тураскаалдарны карактаар ажылды улаштырар.

Школачылар ортузунга патриотчу хей-аътты көдүреринге «Зарница» спортчу оюннуң үлүг-хуузу улуг. Ооң муниципалдыг болгаш регио­налдыг чадалары тергииннерни илередип, дараазында федералдыг чадазынче Тываның эң-не шыырак командазын аъткарар. Эрткен чылын ниитизи-биле спортчу оюнга республиканың шупту кожууннарындан 452 элээди оолдар, уруглар киришкен болза, бо чылын оларның саны 2500 четкен. Түңнел оюнга 10 өөреникчиден болгаш 3 башкыдан тургустунган 16 команда кээп, спортчу маргылдааларга бедик көдүрлүүшкүннүг ачыр-дачыр демисешкеннер.
«Баштайгы дуза» федералдыг төлевилелге 1400 школачы база башкылар идепкейлиг киришкен. Ол — улуг хемчээл­диг хемчег­лерниң бирээзи. Төлевилелди бүгү Россияның «Кызыл крест» хөй-ниити организациязының регионалдыг салбыры-биле кады организас­таан.

Алена НАН-ХОО