Республиканың Аныяктар херектериниң талазы-биле яамызының коллегия хуралы болуп эрткен, аңаа республиканың шупту аныяктар организацияларының төлээлери чыылган.
Ведомство 2025 чылдың бирги чартыында ажылының түңнелдерин үндүрүп, 2025 чылда ажыл-чорудулганың мурнады боттандырар угланыышкыннарын таныштырган. Сайгарылга үезинде яамының ажыл-чорудулгазының аңгы-аңгы угланыышкыннарынга хамаарышкан чугула айтырыглар көдүрген.
Республикада эки турачы ажыл-чорудулганы хөгжүдери – ооң бир угланыышкыны. «Добро.РФ» деп эки турачыларның Чаңгыс аайлаан информация системазының дыңнатканы-биле алырга, 2025 чылда Тывадан 2000 ажыг кижи волонтерлар кылдыр бүрүткеткен. Республиканың волонтерлары ниитизи-биле 62 муң ажыг шак ажылдааш, 485 хемчеглерге болгаш эки турачы акцияларга киришкеннер. Чайгы үеде уругларның айыыл чок чоруун хандырарынга волонтерлар идепкейин көргүскен. Суг объектилеринге айыыл чок чорукту хандырары-биле доктаамал хайгааралды чорудуп, республиканың бүгү девискээринде ада-ие патрульдаашкынының рейд хемчеглеринде идепкейлиг киржип турар.
Регионнарда эки турачы чорукту хөгжүдериниң эң чугула аргазы – “Добро.Центрлерде”. Ол төптерниң эрге-байдалын алыр дээш, 2024 чылда республикадан 5 билдириишкиннерни чоруткан. Аныяктар төвүнүң ийи муниципалдыг төлевилелдери мөөрей шилилгезин, өөредилгезин чедиишкинниг эртип, камгалаттынгаш комплекстерин дарый алырлар. Бии-Хем биле Барыын-Хемчиктиң Аныяктар төптери Россияның “Добро.Центр” четкизи болгаш “Волонтерлар төптериниң ассоциациязы”-биле кады ажылдап эгелээн.
Аныяктар херектериниң талазы-биле яамы республиканың ниитилел ужур-уткалыг хемчеглеринче аныяктарны мөөңнээн. Бирги чартык чылда ведомство 90 ажыг хемчеглерни эрттирген, аңаа 13 муң ажыг кижи киришкен. Ада-чурттуң Улуг дайынынга Тиилелгениң 80 чыл оюн байырлаарынга тураскааткан хемчеглер болгаш акциялар, «Россияның студентилер чазы» XXXIII бүгү-россия чергелиг фестивальдың регионалдыг чадазы, «Зарница 2.0» шериг-патриотчу оюн, ол ышкаш республикада Аныяктар хүнүн демдеглээринге тураскааткан хемчеглер улуг хемчээлдиг эрткен.
Тыва бо чылын «Аныяктар болгаш уруглар» национал төлевилел күүселдези-биле боттандырар «Аныяктарга регион» президент программазынга тиилээн. Аныяктар херектериниң яамызы 2026 чылда аныяктар политиказын хөгжүдер комплекстиг программаже угланган 110 млн. рубльдиң конкурс чагыын камгалап алган.
Программа боттандырылгазы-биле Каа-Хем кожууннуң Сарыг-Сеп суурда болгаш Мөңгүн-Тайга кожууннуң Мугур-Аксы суурда ийи чаа аныяктар төптери туттунар. Ак-Довурактың Аныяктар эгелээшкиннериниң төвү амгы үениң чаа оран-савазын алыр, а Кызылда Аныяктар ордузу дериг-херексел болгаш эт-сеп-биле дериттинер.
Программаның тиилекчилер санынче Тыва 2022 чылда киргенин сагындыраал. Аныяктар херектриниң талазы-биле федералдыг агентилелдиң деткимчези-биле Барыын-Хемчик база Бии-Хем кожууннарда Аныяктар төптери ажыттынган.
Коллегия хуралында 2025 чылдың ийиги чартыында яамының ажыл-чорудулгазының мурнады хөгжүдер угланыышкыннарын таныштырып, «Аныяктар болгаш уруглар» национал төлевилелдиң регионалдыг программаларын боттандырарынче онза кичээнгейни угландырары планнаттынган. «Тыва – эрес-дидим чоруктуң девискээри» шериг-патриотчу чыыш, студентилер ортузунга чараш болгаш эрес-дидим чоруктуң «Даңгына биле Тажы» мөөрейи, «Тываның командазы-2030» өөредилге шуулганы, «Россияның байлаа» национал культуралар фестивалы база чылдың-на эртип турар «Доброфорум-2025» деп эки турачылар шуулганы дээн ышкаш, аныяктарның республика чергелиг улуг хемчеглери ында кирген.
