Амгы үеде республиканың школаларында «Чаш назынның навигаторлары» федералдыг төлевилелдиң удуртулгазы-биле Уругларның бот-идепкей төптери ажылдап турар. Ында түр хостуг үениң «УБТ-де дыштанылга» төптери ажыттынгылаан. Оолдар, уруглар улуг өөрүшкү-биле төптерже барып, янзы-бүрү хемчеглерде хаара туттунган.

«Ниитизи-биле бүдүн регионда 168 төп ажыттынган, ында 40 ажыг муң уруг хаара туттунган. Школачыларны өөредилге, культура, спорт талазы-биле албан черлеринде янзы-бүрү хемчеглер манап турар» — деп, Тываның өөредилге сайыдының хүлээлгезин күүседип турар Ренат Ооржак демдеглээн.

«Мен часкы дыштанылгамны дыка солун кылдыр эрттирип тур мен. Школавыста база янзы-бүрү хемчеглер болуп турар. Ам Республиканың Чуковский аттыг уруглар библиотеказында өске-даа школачылар-биле кады «Уруглар номунуң неделязы» деп хемчегни сонуургап келдим. Сөөлгү үеде номчуттунарынга ынак апарган мен, ынчангаш библиотекаже үргүлчү кээп турар апардым. Бо удаада «Сылдысчыгаш» уруглар солуну тургустунганындан бээр 80 чыл болган деп билип алдым » — деп, Кызыл хоорайның 2 дугаар школазының 7 «б» клазының өөреникчизи Тензин-Лхамо Санчай чугаалаан.