«Сылдысчыгаш» уруглар солуну 1945 чылдың март 1-де тургустунган. 1945-1947 чылдарда ооң баштайгы харыысалгалыг редактору Т. Бегзи, оралакчызы М. Балчий-оол турган. А 1948 чылда солуннуң редактору Н.Л. Кунчун апарган. Ол чылдарда солун неделя санында А3 хемчээлге 7000 тиражтыг үнүп турган. 4 арынныг. Солуннуң өртээ 15 көпеек турган.
1950 чылдарда солунга Д.Д. Аракчаа, О.Д. Сувакпит редактор болуп ажылдаан. Ынчангы ол үени солуннуң езулуг чогаадыкчы сайзыралының үези деп болур. Эң ылаңгыя редакцияның ажыл-чорудулгазынга Тыва Республиканың улустуң чогаалчызы Кызыл-Эник Кудажының киирген үлүг-хуузу эгээрттинмес. База солуннуң сайзыралынга дыл эртемдени Ш.Ч. Саттың киирген үлүү улуг. Ындыг-даа болза 1959 чылда солуннуң үндүрүлгезин соксаткан. Архив документилеринден алгаш көөрге, солунну когаралдыг деп санаан.
А 1990 чылда «Сылдысчыгаш» солуну катап үнүп эгелээн. Бо чылдар дургузунда уруглар солуну чаштарның чугаа-домаан сайзырадыры, тыва дылды кадагалаары, бичиилерниң кижизидилгези дээш оон-даа өске чугула айтырыгларга кол рольду ойнаан.
Сөөлгү чылдарда хүн бүрүде амыдыралдың сайзырап турары-биле база шупту чүүлдер чурагайже шилчип, Интернет четкизиниң аспаанче киргенинден солунну катап база чаарткан.
Ынчангаш 2020 чылдың июль айдан эгелеп уругларның солуну «Сылдысчыгаш» чаа хевирге үнүп эгелээн. Солунну бичии чаштарга эптиг кылдыр А4 хемчээлдиг чараш өңгүр саазында парлап турар.
«Сылдысчыгаш» солуну кайы-даа үеде тыва уругларның ынак солуну болуп арткан дээрзин утпаалыңар.
