Солунувус бо чылын, 2025 чылда, тургустунганындан бээр 80 чыл болуп турар. Бичии уругларның «Сылдысчыгаш» солуну 1945 чылдың март 1-де тургустунган. 1959 чылдың август 1-де ажылын соксаткан турган. А 1990 чылдың февраль 1-де катап чырыкче үнүп эгелээн. Ынчан ооң өртээ 1 көпеекке дең турганы солун.

Чаштар темазы дыка хөй чылдар дургузунда «Тываның аныяктары» солуннуң иштики арыннарынга доктаамал рубрика хевирлиг парлаттынып турган. Ооң соонда уруглар чогаалчызы Александр Шоюн ону катап тургузуп, чырыкче үндүрүп эгелээн. «Сылдысчыгаш» солуну дыка хөй чылдар иштинде 4 арынныг, А3 хемчээлдиг, кара өңнүг үнүп турган болза, сөөлгү 5 чылда ооң редизайнын кылган. Амгы үеде уругларның солуну А4 хемчээл­диг болгаш 12 арынныг. Ону өңгүр, чараш кылдыр «Тывамедиабөлүк» парлалга бажыңының ажылдакчылары парлап турар.

Солуннуң амгы үезин алыр болза, 2 кижиден тургустунган чогаадыкчы коллектив солунну график езугаар үзүктел чокка белеткеп турар. Солуннуң доктаамал номчукчулары, бижикчилери хөй. Ол дээрге рес­публиканың янзы-бүрү школаларының өөреникчилери, ясли-садтарының чаштары-дыр. Олар боттарының амыдыралында солун болуушкуннарны удаа-дараа эккеп турарлар. А эң-не идепкейлиглерге Кызыл хоорайның 9 дугаар гимназиязы база 4 дугаар школазының өөреникчилери, немелде өөредилге төвүнүң «Журналистика» бөлгүмүнүң кежигүннерин хамаарыштырып болур.

Юбилейлиг чылда кылыр ажылдарывыс кандыгыл? Бир дугаарында, Тываның «Баштайгылары» уругларның болгаш аныяктарның шимчээшкини-биле кады аныяккоррларның ортузунга чогаадыкчы мөөрейни чарлаар бис. Мөөрейни күзүн, сентябрь айда, «ДВИЖ» школачыларның медиа-шуулганынга түңнээр. Ынчангаш мөөрейге идепкейлиг киржиңер, уруглар! Солун болуушкуннарны солуннуң арыннарынга чырыдарынче далажыңар. Мөөрейниң дугайында дараазында солунга тодаргайы-биле бижиир.

Мира КОНГУЛ-ООЛ.
«Тываның аныяктары», «Сылдысчыгаш» солуннарның кол редактору.

#сылдысчыгаш80лет