2025 чылда Тыва Респуб­ликаныӊ уругларга «Сылдысчыгаш» деп солуну тургустунгандан бээр 80 чыл оюн демдеглеп турар. Тыва Республиканыӊ Корней Чуковский аттыг уруглар ном саӊыныӊ ажылдакчылары «Сылдысчыгаш» солуннуң аӊгы-аӊгы чылдарда ажылдап келген редакторлары-биле «Чаштарныӊ ынак солуну» деп ужуражылганы эрттирген. Ужуражылгага шүлүкчү, прозачы, хөй чылдарда «Сылдысчыгаш» солунунуң кол редактору болуп ажылдап чораан, 1990 чылда солунну катап тургускан Александр Шоюн, «Тываныӊ аныяктары», «Сылдысчыгаш» солуннарыныӊ кол редактору Мира Конгул-оол база 1992 — 2018 чылдарда солунга корректорлап, өрүкчүлеп база редакторнуң оралакчызы болуп, а 2018 — 2020 чылдарда кол редактору кылдыр ажылдаан Урана Монгуш келгеннер. Кызылдың кадеттер корпузунуң 3-тен 6 класстарыныӊ өөреникчилеринге келген аалчылар «Сылдысчыгаштыӊ» канчаар тургустунуп, кымнар ажылдап турганын тодазы-биле тайыл­бырлап, ооң төөгүзүн сонуургатканнар.

Хоочун журналистерниң ажылдап келген үезинде таварышкан солун сактыышкыннарын уруглар улуг сонуургал-биле дыӊнап, айтырыгларны салганнар.

Урана Монгуш, «Сылдысчыгаш» солуннуң хоочун ажылдакчызы: — Уруглар солуну кезээде школачылар-биле сырый харылзаалыг ажылдап чораан. Уруглар солунче чагааларны үргүлчү бижиир. Школачы чылдарындан бээр идепкейлиг, амгы үеде эртемден, башкылар болган аныяктар хөй. Оларга Тайгана Очур, Эрик Донгак, Менги Ооржак дээш оон-даа өскелер хамаар­жыр.

Мира Конгул-оол, «Тываның аныяктары», «Сылдысчыгаш» солуннарның кол редактору: — Амгы үеде «Тываның аныяктары» биле «Сылдысчыгаш» солуннарны чаңгыс редакция кылдыр кадыпкан-даа болза, солуннар аңгы парлаттынып турар хевээр. Солуннарывысче чагааларын чорудуп турар школачылар хөй. Ийи чыл бурунгаар Кызылдың кадеттер корпузунуң өөреникчилери биле «Сылдысчыгаш» солун тускай төлевилелди боттандырып, кады ажылдажылганы чорудуп турган. Ол арга-дуржулгавысты ам-даа уламчылап, «Сылдысчыгаш» солуну-биле сырый ажылдаарыңарны күзеп тур мен.

Саргылаана Саая, «Сылдысчыгаш» солуннуң номчукчузу: — Бичиимден тура, школачы тургаш-ла, «Сылдысчыгаш» солунну дыка номчуур мен. Оон бээр 30 чыл эрте берген. Ынчан авам, математика башкызы Екатерина Саая Ийи-Тал школазынга чогаа­дыкчы бөлгүмнү ажыткан турган. Мээң чогаал бижиир баштайгы базымнарымга, авам, Екатерина Сааяның, киирген үлүг-хуузу улуг деп бодаар мен.
«Сылдысчыгаш»,
«Сылдысчыгаш»!
Шынчы сөстүг солунум сен.
Үнүп кээрин четтикпейн,
Үргүлчүл-ле манаар-дыр мен.
Амыдырал, өөредилге –
Ажыл-иштиӊ шуптузун-на
Солуннардан даады-ла
Сонуургалдыг номчуур-дур мен.
Эргим ынак солунум сен
Эрги чылда хөйнү кылдыӊ,
Чедип келир, Чаа чылда
Чедиишкиниӊ хөй-ле болзун! – деп, бодунуӊ 30 чыл бурунгаар 8 класс тургаш чогаадып бижээн шүлүүн Саргылаана Саая номчуп күүсеткен.
Каа-Хем суурнуӊ Т.Б. Куулар аттыг дугаары 2 школазыныӊ 8-ки клазыныӊ өөреникчизи Артыш Куулар чараш аялганы игилге ойнап күүседип берген.

Ольга Хиигет.
К.Чуковский аттыг уруглар ном саӊыныӊ ортумак болгаш элээди уруглар килдизиниӊ
библиотекары.
Уруглар библиотеказының чуруктары