Буян Ооржак — телебашкарыкчы база фотожурналист. Ол «Тывамедиабөлүк» парлалга бажыңында ажылдап турар. Бай-Тайга кожууннуң Шуй суурунга ойнап өскен. 2017 чылда Тываның күрүне университединиң төөгү факультединче өөренип кирип алгаш, 2021 чылда доозуп, дээди эртемин чедип алган. «Тывамедиабөлүк» парлалга бажыңының аныяк ажылдакчызының чедиишкиннери хөй. Ол чүгле чурук тырттырары-биле кызыгаарланмайн, журналистиканың өске-даа угланыышкыннарын сонуургап, эрткен чылдан бээр «Тыва 24» телеканалда башкарыкчының ажылын шенеп эгелээн. Ол ышкаш Буян шериг корреспондентизиниң өөредилгезин Новосибирск хоорайга эрткенин сагындыраал.
Буян Ооржак – журналистика адырында чедиишкинниг ажылдап чоруур аныяк кижи. «ТА»-ның номчукчуларынга ооң дугайында таныштырар-дыр бис.
Өг-бүлези
Буян Ооржак Бай-Тайга кожууннуң Шуй ортумак школазын дооскан. Авазы — Роллана Доштуг-ооловна Ооржак. Ол школада хөй чылдарның иштинде педагог башкы кылдыр ажылдап чоруур. Ачазы Эрес Окпан-оолович Ооржак бажыңында мал-маганын азырап, карактап турар. 3 эр дуңмалыг. Дуңмалары өөредилгеге болгаш спортка кончуг сонуургалдыглар.
Оларны деткип, бажыңымга барган үемде билир-ле чүүлдеримни өөредип, кыш боорга, хүннүң-не хөккейлеп ойнаарынга ынак бис деп, ол таныштырган
Студент үелери
Тываның күрүне университединиң төөгү факультедин 2021 чылда дооскан. Сургуул үелер дээрге кижи бүрүзүнүң чуртталгазында эң-не уттундурбас чылдар болуру чугаажок. Буян үргүлчү-ле янзы-бүрү мөөрейлерге, маргылдааларга, акцияларга киржип, шаңнал-макталды ап, идепкейжи сургуулдарның одуруунга турган.
«Студент чылдарымдан сагыш-сеткилимге эң-не аянныг, чырык кылдыр арткан сактыышкыным дээрге «Евразия» шуулганынга киришкенивис болур» — деп, Буян «Тываның аныяктары» солуннуң корреспондентизинге чугаалаан. Аңаа аңгы-аңгы чоннарның культуразын көргүзүп, каш удаа тиилеп турганы аныяктарга чоргааранчыг болбас арга чок.
Ол 2018 чылда вожатый херечилелин немей өөренип алгаш, Улуг-Хемниң Чодураа суурунда «Чодураа» уруглар лагеринге 1 ай иштинде вожатый кылдыр ажылдаан. Оон улаштыр Анапада «Смена» деп Бүгү-российжи уруглар төвүнге база ажылдаан.
2019 чылда шериг кафедразынче кирип алгаш, теориязын 2 чыл өөренген. Университетти доозуп тура, Кызылда 55-ки тускай мото-адыгжы даг-бригадазынга практика эртип ажылдааш, шериг билетти холунга алган.
Амгы ажылы
Амгы үеде Буян Ооржак «Тывамедиабөлүкте» фотограф кылдыр ажылдавышаан, «Тыва 24» каналда телебашкарыкчының ажылын сонуургап турар . Ол университетти доозуп тургаш-ла, парлалга бажыңынче ажылдап кирген. Фотограф кылдыр ажылче кирип алыры база белен эвес. Ажылче хүлээп алырының мурнунда, элээн каш даалгаларны күүседир. Хоорайда Арбат шөлү, Өг-бүле сесерлии, музейни дээш өске-даа чараш черлерни тырттырып эккээр. Аныяк специалист хоочун журналистерниң бирги шылгалдазын эрткеш, күш-ажылчы базымын эгелээн.
Хостуг үезинде
Парлалга бажыңының аныяк ажылдакчызының күш-ажылгыр болгаш кежээзин кады ажылдап чоруур улуг-биче эш-өөрү эскерген. Ол ажыл-агыйы-биле чергелештир бодунуң чурттаар оран-савазын тудуп ап, ада-иезиниң мал ажылынга дузалажып четтигип турар. «Бичии-ле хостуг үе, дыштаныр хонуктар тыптып келзе, ада-иемниң чанынга барып, оларның-биле чоок чугаалажып, дузалажырынга ынак мен» — деп, ол чугаалап турар. Ындыг болбас арга чок, көдээ черде мал тудуп чоруур улус билир. Суур черге мал-маган азыраар болза-ла, бажыңның аап-саап ажылдары төнмес болур. Аңаа сиген кезилдези, кышка белеткел дээш сезоннуг ажылдар база немежир.
Ындыг-даа болза Буян тыва ырылар дыңнаар, хөккей ойнаарынга ынак.
Аныяктарга сүмези
Мээң бодалым-биле алырга, амгы үеде өзүп олурар аныяктарывыс төрээн тыва дылын кадагалаар болза эки. Тыва дылга үргүлчү чугаалажыр. Оон ыңай чалгаа чорук кажан-даа эки чүвеге чедирбес. Ону сактып алыры чугула. Ол ышкаш спортка хандыкшып, кадык амыдыралды нептередир ужурлуг бис.
Республикавыстың бурунгаар хөгжүлдези бичии базымнардан, боттарывыстың кызымак чоруувустан хамааржыр!
Алена НАН-ХОО.
Чуруктар Буян ООРЖАКТЫҢ
