Кызыл хоорайның 3 дугаар школазынга «Эрес-дидим чоруктуң кичээлинге» Россияның Маадырлары Буян Куулар база Найыр Кыргыс киржип, уруглар-биле ужуражылганы эрттирген.
Ужуражылга үезинде школачыларга офицерлерниң эрес-дидим чоруунуң дугайында документалдыг кадрларны көргүскен. Ол ышкаш оолдар, уруглар Маадырлардан сонуургаан айтыргларын салып, чугаалажыр аргалыг болган. Тулчуушкун шөлүнде кижиниң сагыш-сеткили, коргуушкун турар бе, ёзулуг эр найырал деп чүл дээн ышкаш айтырыглар элээдилерни сонуургаткан.
«Аныяк сураглыг кижилерниң чанынга тургаш, бөдүүн чүүлдү билдивис: маадырлар шериг хептиг база погоннарлыг, а эң-не кол чүүл – эрес-дидим чүректиг» — деп, организакчылар боттарының бодалдары-биле үлешкен. Олар Буян Кууларга болгаш Найыр Кыргыска «эрес-дидим, буянныг база шынчы чоруктуң кичээлинге» киржип, ужуражылганы эрттиргенинге четтиргенин илереткен.
Буян Куулар «Тываның маадырлары» регионалдыг кадрлар төлевилелиниң киржикчизи дээрзин сагындыраал.
