Тываның Баштыңының мурнундан байырлыг сөстү Чазак Даргазының оралакчызы Виталий Бартына-Сады чедирген.
«Май 6 бистиң республикавыстың төөгүзүнде онзагай хүн болур. Үндезин хоойлуну хүлээп алган хүн дээрге чүгле албан езу байырлалы эвес, а чугула хоойлуну хүлээп алган уттундурбас кол болуушкун-дур. Тываның хөй нациялыг чону өгбелеривистиң езу-чаңчылдарынга даянып алгаш, боттарывыстың сонуургалдарывысты илередип турар бис. Бис амгы болгаш келир салгалдарның мурнунга Тываның социал-экономиктиг болгаш культурлуг сайзыралы дээш харыысалгавысты миннип, республиканың шупту чоннарының чаагай чоруу дээш кызып чоруур бис» — деп, ол демдеглээн.
Байырлыг хемчег үезинде Өвүр кожууннуң Хандагайты ортумак школазындан, Кызыл хоорайның школаларындан оолдар, уругларга паспорттарны тывыскан.
«Мен төрээн чуртумга ынак мен. Паспорт алыр дээш Өвүр кожуундан орук ырак-даа болза, чедип келдивис. Паспорт алганымга өөрүп тур мен» — Хандагайтыдан Дмитрий Минчээ чугаалаан.
«Бөгүн байырлыг байдалга Россияның паспортун тыпсып турары дээш дыка өөрүп тур мен. Келир үеде чуртувустуң төлептиг хамаатызы болур дээш ам-даа өөренип, ажылдаар мен» — деп, Кызылдың 1 дугаар школазының өөреникчизи Анастасия Байкара «ТА»-ның корреспондентизинге чугаалаан.
Мира КОНГУЛ-ООЛ,
чуруктарны Ада ТЮЛЮШ тырттырган.
