2021 чылдың октябрь 4-те чурттуң Президентизи Владимир Путин чыл санында октябрь айның 3 дугаар улуг-хүнүнде Адалар хүнүн байырлаарының дугайында 573 дугаарлыг Чарлыкка атты салган. Ооң кол сорулгазы өг-бүлениң ёзу-чаңчылдарын быжыглап, ажы-төлдүң кижизидилгезинге ада кижиниң үлүг-хуузун бедидери болур.
Ажы-төл кижизидилгезинге ада кижиниң ролю улуг. Быжыг, найыралдыг, аас-кежиктиг өг-бүлениң дөзү — ада кижиден хамааржыр. Адалар хүнүн уткуштур 7 «а» класстың өөреникчилери Хомушку Сухбат биле Монгуш Доржунуң ачаларын дээрже үндүр мактаксаар мен. Школаның адалар чөвүлелиниң кежигүннери. Бо адалар ада-ие хуралынга үргүлчү кээп, оолдарының өөредилгезиниң база чурумунуң дугайында билип ап турарлар. Кабинеттиң дерилге, септелгезинге үргүлчү дузалажырлар. Оолдарын төлептиг, эки кижилер кылдыр өстүрүп турарлар.
Хомушку Чаян Борисович- респсихбольницаның электриги. Кончуг шевер, топтуг-томаанныг, шыңгыы, үлегерлиг ада. Чаян Борисович оглунуң номчулгага сонуургалын оттурар дээш, үргүлчү чаа номнар садып бээр. Кады шүлүктер доктаадырлар. Оглу Хомушку Сухбат — каш дакпыр аянныг номчулга мөөрейлериниң тиилекчизи. Адалар хүнүнге тураскааткан «Мээң ачам — эң-не тергиин» деп шүлүк мөөрейинге 1-ги черни алган. Сухбаттың чуруму, өөредилгези эки, номчуттунарынга ынак, ырлаар, танцылаар, шахмат ойнаар. Шылгараан эртеми — математика. Бүгү талазы-биле талантылыг.
База бир клазывыстың үлегерлиг адазы Монгуш Анатолий Анатольевич. Ол — евро-дээвиирлер кылып турар хууда сайгарлыкчы. Аажы-чаңы томаанныг, кежээ, дыка биче сеткилдиг, дузааргак. Ажы-төлү аас-кежиктиг чурттазын дээш, Анатолий Анатольевич ажыл-ишке кызымаккай, төлептиг ада. Оглу Монгуш Доржуну спортка ынак, ажыл-ишке кежээ, арыг-силиг кылдыр кижизиткен. Доржу — эки өөреникчи, быжыг сагылга-чурумнуг. Каратэ, хүреш секциялары барып турар. «Бут бөмбүүнүң тергиини» деп номинацияның эдилекчизи.
Ада-ие башкы-биле демниг ажылдаар болза, ажы-төл ада-иезин, башкыларын өөртүптер түңнелге кээр. Ада кижи ажы-төлге үлегерлиг болур болза-ла, оруу ажык, шупту чүве чогуп, шуудап турар болур.
Салбакай Шангыр-ооловна Эртне,
Кызыл хоорайның 9 дугаар гимназиязының 7 «а» класстың башкызы
