Тываның өөредилге сайыдының хүлээлгезин күүседип турар Ренат Ооржак Новосибирск хоорайның тыва студентилери-биле ужуражылганы эрттирген. Сибирьниң суг транспортунуң күрүне университединге ук хоорайниң дээди болгаш ортумак өөредилге черлериниң студентилери чыглып кээп, сонуургаан айтырыгларын чугаалашканын регионнуң Өөредилге яамызы дыңнаткан.
«Студентилер-биле ужуражылгага республикавыстың инвестициялыг төлевилелдеринге база ниитизи-биле инженер каадырларның чугула херегин тайылбырладым. Техниктиг дээди өөредилге черлериниң үстүкү курсчулары Тываның бүдүрүлгелеринге практиказын эрттирериниң болгаш улаштыр боттарының мергежилиниң аайы-биле ажыл-агыйга тургустунуп алырынга дузаны дилээннер. Оларның дилээ езугаар ажыл берикчилери-биле ажылдаар бис.
Оон аңгыда аныяктар ук хоорайда тыва землячествога оран-сава айтырыын (ужуражылгалар база янзы-бүрү хемчеглер эрттирер) тургусканнар. Бо айтырыг талазы-биле кады ажылдажылга дугайында Новосибирск облазының Өөредилге яамызында коллегаларывыс-биле баш бурунгаар чугаалаштывыс. Ужуражылгага хоочун башкы Татьяна Оюновна Санчаа киржип, студентилерниң нарын айтырыгларын демдеглээн. Ол 2015-2020 чылдарда Тываның Өөредилге яамызының сайыды кылдыр ажылдаан. Татьяна Оюновна Новосибирскиниң күрүнениң башкы университединде ажылдап турар болгаш, оолдар, уругларның мурнунда таваржып турар айтырыгларны эки билир. Ол – дыка хөй башкыларның дагдыныкчызы, аныяктарга дузалажып чоруур.
Университеттиң удуртулгазы-биле база чугаалаштым. Оларның структуразында профильдиг колледж база бар. Суг угланыышкыны-биле Тывадан 200 хире кижи өөренип турары кайгамчык болду. А дээди эртем чедип алыры-биле, 28 кижи өөренип турар. Оларга өөредилге черин чедиишкинниг доозуп алырын күзедим» — деп, сайыт Ренат Ооржак демдеглээн.
