Бии-Хем кожууннуң Хадың суурунуң школазында «Движение первых» уругларның болгаш аныяктарның хөй-ниити организациязының идепкейжизи Бай-Кара Монгуш «Төөгүнүң кадагалакчылары» отрядты тургузар сорулганы салган.

Элээдилер Ада-чурттуң Улуг дайынының киржикчилериниң тураскаалын аштап арыглаан. Аныяк патриотчуларны Баштайгыларның регионалдыг салбырындан Александр Кардополов болгаш Аяслана Кунгаа деткип, школачыларның «Төөгүнүң кадагалакчылары» төлевилелге сонуургалы дээш четтиргенин илереткен.

«Хадың суурнуң школачыларынга тускай даалгаларлыг конвертти дамчыттывыс. Олар мемориалдың төөгүзүнүң дугайында видеороликти тырттыргаш, боттарының чаагай ажыл-херээн демдеглээри чугула. Декабрь айда Баштайгылар «Төөгүнүң кадагалакчылары» отрядтың одуруунче изиг күзелдии-биле кирип турар школачыларны байырлыг байдалга ыдыктаар» — деп, Баштайгыларның Тывада регионалдыг салбырының специалистери демдеглээн.

Алена Нан-Хоо