Тываның баштайгылар шимчээшкини «Чугула улуг кижи» төлевилелди эгелээн. Чаш уруг бүрүзүнүң амыдыралында берге үелерде деткип кээр, аңаа бүзүрээр, күзелдерин чедип алырынга дузалаар кижи чугула черни ээлеп турар.
«Чугула улуг кижи болуру – уругнуң чөленгиижи, амгы үеде силерниң кичээнгейиңер аңаа херек, ооң хей-аът көдүрүкчүзү база өңнүү апаар силер. Тываның баштайгылар шимчээшкини биле Добро.рф сагыш човангыр, ажык сеткилдиг, бодунуң арга-дуржулгазы, мергежили-биле үлежиринге белен база амыдыралдың берге байдалдарынга таварышкан уругларга деткимчени көргүзеринге белен аныяктарны чалап турар» — деп, Баштайгылар шимчээшкининиң специализи Марианна Хомушку чугаалаан.
Дагдыныкчы апаарыңарга, силерни чүү манап турарыл?
Бир-ле уругнуң амыдыралын эки талазынче өскертип болур арга тургустунар.
Өскелерге дуза кадып чорууруңар дээш, сагыш-сеткил оожургалын чедип ап болур.
Чаа арга-дуржулга болгаш билиглер.
Солун кижилер-биле ужуражылгалар.
Баштайгылар шимчээшкининиң хемчеглеринге киржири.
Берге байдалдарны шиитпирлээринге дуза.
Өске дагдыныкчылар-биле ужуражылга, арга-дуржулга солчулгазы.
Баштайгылар психологтар-биле өөредилгени болгаш консультацияны организастаар. Ол ышкаш өске-даа кураторлар-биле кады ажылдажылганы чорудар.
Тывада «Чугула улуг кижи» төлевилелдиң баштайгы дагдыныкчызы кылдыр ТР-ниң Дээди Хуралының депутады Ролан Ооржак бүрүткенин сагындыраал.
Уругларга деткимче көргүзеринче угланган төлевилелди хөй-ниитижи Ролан Ооржак аажок сонуургаан. Ол төлевилелге дорт киржир дээш, «чугула улуг кижи» кылдыр дораан-на бүрүткедип алган. Кинорежиссёр болгаш хөй-ниитижи Баштайгылар шимчээшкининиң аныяк-өскенни кижизидеринче угланган хемчеглерин күзелдии-биле деткип чоруур.
Ол ышкаш билдингир ыраажы, Тываның алдарлыг артизи Ишкин оглу – Айдың Монгуш дагдыныкчы кылдыр бүрүткеткен.
Айдың Монгуш, сценада чажыт ады Ишкин оглу – регионнуң культуразының, уран чүүлүнүң хөгжүлдезинче үлүг-хуузун киирип чоруур чогаадыкчы аныяк кижи. Ол – тыва чоннуң езу-чаңчылдарын нептередип база камгалап чоруур уран чүүл ажылдакчызы. Ооң база бир кол сорулгаларының бирээзи – өзүп олурар салгалдарга национал бот-минниишкини сиңирери.
Баштайгылар шимчээшкининиң «Чугула улуг кижи» төлевилели амыдыралдың берге байдалдарынга таварышкан назы четпээннерге дуза кадарынче угланганын сагындыраал. Ооң кол сорулгазы уругнуң бодунга бүзүрелин оттурар, салым-чаяанын илередиринге дузалаар база амыдыралдың шын оруунче үдээри.
Мира КОНГУЛ-ООЛ.
Чуруктарны социал четкилерден алган
