Тывада ажыл-биле бот-хандыртынган 18-тен 35 хар чедир аныяктар бизнес болгаш социал эгелээшкинниг төлевилелдеринге грант алыкчыларының регионалдыг мөөрейлеринге киржирин чөпшээрээн. ТР-ниң Аныяктар херээниң талазы-биле яамының саналдааны-биле республиканың чазаа мөөрейниң негелделерин өскертип, оларның санынче профессионал орулгазынга үндүрүг төлекчилерин киржикчилер санынче албан-биле киирген.

Грантыже чагыг киирген кижилер мөөрей шилилдезинге тиилээн соонда, хуу сайгарлыкчы кылдыр бүрүткедир хүлээлгелиг. Хуу сайгарлыкчы апаарга, үндүрүглер көвүдеп, отчеттар дужаап, ажыл-чорудулгазы кызыгаарлаттына бээринден, аныяктарның хөй кезиинге ол негелде таарышпайн турарын арга-дуржулга көргүскен. А аныяктар, ылаңгыя бизнесче баштайгы базымнарын кылып турарлар, кандыг-даа удуртукчу, офис база отчеттаашкын чокка ажылдаксаары билдинген.

«Аныяктарның бизнес-төлевилели» регионалдыг мөөрей дугайында дүрүмче киирген эдилгелер ажыл-биле хандыртынган аныяктарга боттарының эрге-байдалын өскертпейн, хуу сайгарлыкчылар ышкаш, саң-хөө деткимчезин алырын чөпшээрээн. Ол чурум бизнес-төлевилелдерге, ол ышкаш социал айтырыглар-биле ажылдаар төлевилелдерге хамааржыр. Оларның авторлары шилилдени эрте берзе, 100 муңдан 300 муң рубль чедир грантыларны ап болурун сагындыраал.

Оон аңгыда, ол мөөрейге киржир дизе, билдириишкинни база чогуур документилерни киирерин бөдүүнчүткен. Ам аңаа киржирде, «Россияның аныяктары» күрүнениң информация системазынга бүрүткедири база бодунуң төлевилелдерин ооң шөлүнге салыры албан эвес апарган.
Киржикчилерниң чугаазы-биле алырга, хөй санныг техниктиг частырыглар база сайтыда үрелиишкиннер уржуундан, ол бо-ла кылдынмайн баар. Бөгүн «Аныяктарның бизнес-төлевилелдери» мөөрейниң грантызынче кордакчылар Тываның Аныяктар херээниң талазы-биле яамыже боттарының чагыын киириптерге-ле чедер.

Мөөрейниң негелделеринде өскертилгелер аңаа киржир күзелдиг улустуң санын көвүдедир чадавас деп яамы санап турар. 2021-2023 чылдарда 300 ажыг аныяктар аңаа киришкен, а 45 төлевилел ниитизи-биле чеди сая рубль түңнүг деткимчени алган. 2024 чылда мөөрейниң грант фондузу 2,5 сая рубль болган, ооң 1,4 сая рубльди бизнес-төлевилелдерже, 1,1 сая рубльди – социал эгелээшкиннерже угландырар.

«ТуваМедиаГрупп» медээлеринден