Тываның Аграрлыг лицейиниң чедиги классчылары Ханты-Мансийскиге эрткен Президентиниң кышкы хевирлерге спортчу маргылдаазынга ниити командага үшкү черни ээлээн. Оон аңгыда Айдыс Комбу-Сюрюн база Кенден Конга ийиги болгаш үшкү черлерни тус-тузунда чаалап алганнар.
П.А. Морозов аттыг Аграрлыг лицейниң өөреникчилери бүдүн неделя дургузунда Ханты-Мансийскиге эрткен Президентиниң кышкы хевирлерге спортчу маргылдаазынга Тываның мурнундан киришкенин сагындыраал. Олар спортчу маргылдааларга, хаак чарыжынга, биатлонга, теоретиктиг мөөрейге адааннашканнар. Команданың кежигүннериниң аразында Мөңге-Назын Цончу, Конга Кенден, Комбу-Сюрюн Айдыс, Иргит Аэлита, Салчак Янчэн, Ондар Лириана бар. Бичии спортчуларны күш-культураның бирги категориязының башкызы Айдын Монгуш удуртуп чораан.
Аграрлыг лицейниң өөреникчилериниң командазындан аңгыда, Тываны Ак-Довурак хоорайда «Өлчей» лицейниң командазы база төлээлээн. Ийи лицейниң кайызы-даа «Школаже биатлон» бүгү Россия чергелиг төлевилелдиң киржикчилери болган. Олар школачы биатлон клувунуң дериг-херекселдерин чүмээр сертификатты чаалап алганнар.
Өөредилге яамызының материалындан Мира Конгул-оол белеткээн.
Чуруктарны социал четкилерден алган.
