«Кадык камгалалы» национал төлевилелдиң иштинде «Кадык камгалалының медицина албан черлерин квалификациялыг каадырлар-биле хандырары» регионалдыг төлевилел езугаар аныяк специалистер республиканың эмнелгелеринде ажылдап кээп турар.
Оларның аразында Республиканың уруглар эмнелгезинде 9 эмчи немешкен: 4-ү тускай сорулгалыг керээ-биле ординатураны дооскаш келген, 4-ү Сибирь федералдыг округтуң дээди өөредилге черлерин дооскан, а бир эмчи республикадан дашкаар девискээрден дедир эглип келген.
Бо чылда Уруглар эмнелгези 11 аныяк эмчиге чаңгыс удааның акша төлевирин алыр документилерни белеткээн. Оларның 3-ү акша-хөреңгини алган.
Чыл эгезинден тура Республиканың уруглар эмнелгезинче 27 аныяк эмчи ажылдап киргенин сагындыраал.
