Республиканың эмчи колледжизиниң хөй-ниити чуртталга бажыңында сургуулдарның чуртталгазы солун болгаш ажыктыг эртип турар. Ында янзы-бүрү бөлгүмнер ажылдап, солун хемчеглер болуп турарын сагындыраал.
Хөй-ниити чуртталга бажыңында кижизидикчи башкы Рада Салчак тыва национал чемнерниң бирээзи – шөйген быштакты белеткээрин уругларга өөреткен. Ону сүттен кылыр болгаш шөйүлдүр тыртып тургаш белеткээр. Ынчангаш ооң ады – шөйген быштак. Сургуулдар кылып алган чемин амзааш, бодалдары-биле үлешкеннер.
«Кижизидикчи башкывыс Рада Александровна бистерге национал тыва чемнерни кылып өөредип турар. Ол ышкаш кижиниң мага-бодунга сүттүң ажыктыын таныштырган. Инек сүдүнден 15 аңгы тыва аъш-чемни кылып болурун билип алдывыс» — деп, сургуулдар демдеглээн.
Республиканың эмчи колледжизиниң чуруу
