Сүт-Хөл кожууннуң Хөр-Тайга суурунга «Ада-иелерниң агрошколазы» төлевилелдиң байырлыг ажыдыышкыны эрткен. Ук төлевилел Россияның «Билиг» ниитилелиниң бот-идепкейлиг ада-иелер каттыжылгазын деткиир сорулгалыг бүгү-россияның мөөрейинге грантыны тиилеп алган.
Агрошколаны ажыдып тургаш, өөреникчилерге мастер-класстарны, күскү ярмарканы, ада-иелер ортузунга кулинарлыг мөөрейни организастаан. Ол ышкаш массалыг флешмоб база концерт көргүзүглери байырлалды улам солун болдурган.
«Бистиң школавыстың ада-иелер каттыжылгазының төлевилели мөөрейге тиилээш, 1 сая рубльди ойнап алган. Ол акша-хөреңги-биле школада поликарбонаттан 2 улуг теплицаны, автоматчыткан суггарылга системазын, огород суггарарынга херек кудукту кастырган болгаш келир часка ногаа аймааның база чечектерниң үрезиннерин садып алган бис» — деп, школаның директору Долаана Монгуш демдеглээн.
Ол ышкаш «Ада-иелерниң агрошколазы» өөредилге албан чериниң материал-техниктиг базазын экижидеринге дузалыг болгаш кижизидилге ажылынга таарымчалыг деп, башкылар санап турар.
