Хүреш Кыргыс Кызыл хоорайның 9 дугаар гимназиязының немелде өөредилге төвүнде «Шотокан хевирниң каратэ-до» секциязында 2003 чылдан бээр ажылдап турар. Ооң кол сорулгазы – уругларны күш-культура болгаш спортче хаара тудары база өзүп олурар салгалдың бүгү талалыг сайзыралын чедип алыры, кадыкшылын быжыглаары, кадык амыдыралды суртаалдаары, элээдилер ортузунга корум-чурум үрээшкинин болдурбазы. Каратэ-донуң Шотокан хевиринге чогаадыкчы каттыжылгазының удуртукчузунга ону школаның ынчангы директору В.Ө. Дөмүр-оол томуйлаан.
Чогаадыкчы каттыжылганың баштайгы чылдарында-ла республика болгаш хоорай чергелиг маргылдааларга өөреникчилер шаңналдыг черлерни ээлеп эгелээн. 2004-2005-2006 өөредилге чылдарында янзы-бүрү чергениң маргылдааларынга Анай-Хаак Кашкак, Айдана Ширин, Любовь Монгуш, Омак Ооржак, Буян Сат болгаш өскелер-даа тергиин көргүзүглерни чаалап алганнар. 2006-2007 өөредилге чылында Чогаадыкчы каттыжылганың өөреникчилери Москва хоорайга Россияның бирги чери дээш маргылдаага киришкеннер. Ол ышкаш бүгү делегейниң каратэге турнири, каратэге чемпионат, Тхеквондога студенчи фестивальдың спортчу маргылдаазы, «Чедиишкинниң кубогу» Россияның каратэге чемпионады дээш чыл санында өөеринкчилерниң киришкен маргылдаалары хөй.
«Школада эр башкылар чөвүлелиниң идепкейжизи, немелде өөредилге төвүнүң башкызы Хүреш Хураковичиниң уруглар кижизидилгезинде киирип чоруур үлүг-хуузу улуг. Ол үстүкү класстарның оолдарын спортче хаара тударындан аңгыда, амыдыралдың эки-багай талаларын оларга айтып берип, ада сагыш салыышкынны көргүзүп турар. Хүреш Хуракович – сагыш човангыр, кижизиг, идепкейжи башкыларның бирээзи» — деп, школаның директору Солангы Тамчай демдеглээн.
Хүреш Хуракович Кыргыс – хөй-хөй шаңнал-макталдарның эдилекчизи. Ооң аразында «Тыва Республиканың күш-культуразының болгаш спорттуң тергиини» аттың эдилекчизи, Аныяктар херектериниң болгаш Өөредилге яамыларының Хүндүлел бижиктеринге төлептиг болганын демдеглээл. Аңаа «Өөредилгениң хөгжүлдезинге киирген үлүг-хуузу дээщ», «ИХЯ-ның ОМОН-нуң 15 чылы», «Милицияның 100 чылы», «Афганистандан совет шериглерни үндүргенинден бээр 25 чылы» медальдарны тывысканынга эш-өөрү, кады ажылдап чоруур коллегалары чоргаарланып чоруур.
Мира КОНГУЛ-ООЛ.
Хүреш Кыргыстың чуруктары
