Республиканың профессионал ортумак өөредилге черлерин кызыл диплом-биле дооскан аныяктарга тураскааткан байырлыг хемчег эрткен. Ниитизи-биле бо чылын 3210 кижи ортумак профессионал эртемни чедип алган. Оларның аразында 234 кижи кызыл дипломнарны алган. Аныяктарга республиканың удуртукчулары байырны чедирген.
Тываның Баштыңы Владислав Ховалыг тергиин демдектер-биле ортумак өөредилге черин дооскан аныяктарга чедиишкиннерни күзээн:
«Бөгүн Тывада 234 доозукчу ортумак профессионал өөредилге черлерин кызыл диплом-биле дооскан. Ниитизи-биле республиканың 16 өөредилге чери 3210 кижини доостурган.
Чурттуң Президентизи болгаш Россияның Чазааның деткимчези-биле колледж, техникумнарга шынарлыг өөредилге байдалын хевирлээр дээш бүгү күжүвүстү үндүрүп турар бис. Чоокта чаа Ак-Довурактың даг болгаш Кызылдың тудуг техникумнары «Профессионалитет» федералдыг төлевилелче кирген. Ортумак өөредилге черлериниң партнёрлары, ажыл берикчилери, өскерлиишкиннерни эскерип турар. Тус черниң чурттакчыларының аразындан тускай мергежилдиг болгаш хереглелдиг специалистерниң саны көвүдээри ниити түңнеливис болур ужурлуг. Ак орукту күзедим, аныяктар!»- деп, ол демдеглээн.
Өөредилге яамызының сайыды Елена Хардикова:
«Июнь айның төнчүзүнде чаңчыл езугаар доозукчуларның байырлыг хемчеглери эртип турар. Өөредилге яамызы кызыл дипломнарны холга алган аныяктарга тураскааткан байырлыг хемчегни организастаан. Оларның саны бо чылын 234 кижи болган. 2023 чыл-биле деңнээрге, 6 кижи хөй болган. Ниитизи-биле бо чылын ортумак профессионал өөредилге черлерин 3210 аныяктар дооскан. Бөгүн мында 80 хире аныяк кижи чалаттырган. Олар дээрге техникумнарны чүгле кызыл диплом-биле дооскан эвес, а спортчу, культурлуг, хөй-ниити хемчеглериниң идепкейжилери болгаш янзы-бүрү мөөрейлерниң киржикчилери-дир. Бөгүнгү хемчегниң кол акцентизи – аныяктары аңгы-аңгы адырлар аайы-биле ажыл-агыйга тургузары. Чүге дизе олар ортумак эртемниң дипломун холга алган, эртенги хүнден эгелээш, тудуг, орук, экономика, кадыкшыл дээш өске-даа адырларга ажылдап болур аныяк специалистер-дир. Ынчалза-даа баш бурунгаар мониторинг езугаар алырга, аныяктарның хөй кезии улаштыр дээди эртем чедип алыр сорулгалыг. Ол база эки. Ындыг-даа болза арга-дуржулга кирип ажылдавышаан, дээди эртемни чедип алыры база багай эвес.
Бистиң республикавыс хүнден хүнче сайзырап кел чыдар, ынчангаш ажылчын күш кажан-даа херек. Партнёрларывыс база ортумак эртемниг специалистерни доктаамал хереглеп турар. Бөгүн аныяктарны «ажылдап эгелээри ындыг-ла багай эвес» деп шынзыдыптар чадавас мен» — деп, журналистерге чугаалаан.
Аюш Балдан, Тожу кожууннуң даг-техниктиг техникумунуң доозукчузу:
— Мен Адыр-Кежиг ортумак школазын 2019 чылда дооскан мен. Оон улаштыр төрээн кожуунумда ортумак өөредилге черинче кирип алдым. Өске хоорайларга өөренир арга турган, ынчалза-даа Тожуга өөренип алгаш, аңаа улаштыр ажылдап артып каар күзелим-дир. Улаштыр Тожуга ажылдавышаан, ТывКУ-га бот-өөредилге-биле өөренмишаан, дээди эртемни чедип алыр мен.
Алина Маадыр-оол, Сай-кыс Саая, эмчи колледжизиниң доозукчулары:
— Бис улаштыр эмчи талазынче дээди эртем чедип алыр дээш өөренир бис. Колледжке кызымаккай өөренгенивис түңнелинде, кызыл диплом-биле доозары өөрүнчүг-дүр. Улаштыр өөренип киреринге, кызыл диплом дээш 10 балл база немээр, оон аңгыда олимпиадаларга, мөөрейлерге киржирге база баллдар немежир.
Мира КОНГУЛ-ООЛ
