Ай-Хээ Тюлюш, Чаа-Суур ортумак школазының 11-ги классчызы:

— Эрткен чылын база бо шуулганга киржип турдум. Ооң соонда школамга баргаш, улуг класстарның өөреникчилеринге презентация хевирлиг таныштырылганы кылган мен. Школавыска медиа-төптү ам ажыдар, ынчалза-даа Баштайгыларның шупту хемчеглеринде идепкейлиг киржип турар бис. Бо чылын эштерим Аймира Доспан, Лада Маадыр, Ариуна Чамзырай база башкывыс Шораана Тумат-биле шуулганның ажылынга кириштивис.

Аңгырак Монгуш, Чөөн-Хемчик кожуунда Чыргакы ортумак школазының башкызы:

— Школавыста медиа-төптү чаа ажыдып турар бис. Ынчалза-даа баштайгы медээлерни болгаш видеоматериалдарны уруглар боттары кылып эгелээн. Чаа өөредилге чылында уруглар школаның Президентизиниң соңгулдазындан видеоматериалды белеткээн. Оон аңгыда башкыларга база байыр чедириишкинин солун кылдыр белеткээннер. «ДВИЖ» шуулгандан дыка хөй ажыктыг чүүлдерни билип алдывыс. Школачылар база дыка сонуургаан.

Конгар Шимит, Таңдының Сосновка школазының өөреникчизи:

— Бистиң школавыста медиа- төптү эрткен чылын ажыткан. Ында школа амыдыралындан медээлерни, видеоматериалдарны белеткеп турар бис. Колдуунда-ла хемчег бүрүзүнден деп болур. Бо чылын Таңдының 3 суурундан 10 өөреникчи шуулганда кириштивис. Өөредиглиг шөлчүгештерниң ажылы солун болгаш ажыктыг болду.
Аңаа медиа адырга хамаарышкан янзы-бүрү угланыышкынныг шөлчүгештер ажылдаанын сагындыраал. А хемчегниң кол аалчызы Россияның #Движение_первых организацияның медиакоммуникациялар департаментизиниң регионнар-биле ажылдаар килдизиниң начальниги Андрей Перцев болганы чугаажок. Спикерлер Инна Клоян, Азамат Очур, Алдынмаа Тюлюш, Ролан Ооржак, Юлия Борбак-оол угланыышкын аайы-биле уругларга солун таныштырылганы кылган.

Шуулганның киржикчилери Андрей Перцевтиң удуртканы бөлүктүң ажылын сонуургап, медиа-төлевилелдер дугайында билип алган. Ол элээдилерге бодунуң чедимчелиг медиа-төлевилелдерин таныштырбышаан, аудитория-биле үре-түңнелдиг кады ажылдажылганың дугайында чугаалаан.
Алена НАН-ХОО.
Аяна ЛАМАНЫҢ чуруктары