«ДВИЖ» школаларның медиа-албаннарының респуб­лика чергелиг шуулганы уругларның сонуургалын оттурган. План езугаар шуулганга 160 школачы киржир турган болза, херек кырында 214 элээдилер келген.

Чүгле Улуг-Хем кожуундан безин 40 өөреникчи бар. Шуулганның бир хүн дургузунда уламчылаан ажыл-чорудулгазында «Тележурналис­тика», «Тыва журналистика амгы үеде», «Блогинг», «Фотография», «Видеография», «СММ-бурунгаарлаашкын», «Информастыг айыыл чок чорук» деп шөлчүгештер уруг­ларны хаара туткан.

Шуулганның ажылынга республикада билдингир журналистер Эльвира Лифанова, Виталий Кузнецов, Надежда Сат, Тамара Кабимульдинова, Бадма Даржаа дээш оон-даа өскелер киришкен. Олар келир үеде журналисчи орукту шилип алган уруглар-биле ужуражылганы өөрүшкү-биле хүлээп алган. Ол ышкаш билдингир журналистер чамдык шөлчүгештерниң эксперттери болбушаан, уругларның сонуургаан айтырыгларынга изиг күзелдии-биле харыылааннар. Журналист мергежилдиң үндезиннеринге школачыларны кинорежиссёр Ролан Ооржак, блогер Чечена Седен, видеограф Сай-Даш Монгуш, фотограф Наталья Ондар, SММ-специалист Чейнеш Намзырай, ЦУР-нуң оралакчы даргазы Сайзана Донгак өөреткен. Шуулганның партнерлары — Тываның Культура яамызы, ТР-ниң креативтиг индустрия школазы, ТР-ниң регионну башкарар төвү, ТР-ниң Өөредилге яамызы, ТР-ниң информатизация яамызы, «Тыва» КТРК, «Тывамедиабөлүк» парлалга бажыңы, ТР-ниң журналистер эвилели.

Школачылар сөзүглел бижиириниң, сюжет тырттырарының чажыттарынга өөренип, теле-башкарыкчының орнунга боттарын шенээн. Ол ышкаш оолдар, уруглар стендаптарны бижип, бот-боттарындан интервьюларны алган. Бо-ла бүгү чүүлдер-биле чергелештир сюжетти монтажтаарын, чурукту чараштыр тырттырарын, социал четкилерге ажылдаарын билип ап, ниитизи-биле информастыг продукцияны бүдүрериниң баштайгы билиг­лерин алган.
Уруглар-биле ажылдың медиа адырын кончуг чугула деп, Баштайгылар санап турарлар. Школачыларның медиа-культуразын хевирлээри кол черни ээлеп турар. Шуулган соонда сорук кирген уруглар, оолдар школаларынга баргаш, медиа-төптерни тургузуп, солун, онзагай болгаш ажыктыг медээлерни кылып эгелээн. Кызыл хоорайның 3, 17, 1 дугаар школаларында, Шагаан-Арыгның 1, 2 дугаар школаларында, Сарыг-Септиң 1 дугаар база Ак-Довурактың школаларында медиа-албаннар тургустунгулаан. Амгы үеде республика иштинде 11 медиа-албан ажылдап турар.

Алена НАН-ХОО