Владислав Ховалыг, Тываның Баштыңы:
«Бөгүн Тывада 11-ги класстың 2285 доозукчузу бодунуң амыдыралында чугула чаданы эртип турар. Оларның аразында 120 кижи – эки өөредилгезиниң түңнелинде алдын болгаш мөңгүн медальдарның кордакчылары.
Башкыларниң могаг-шылаг чок ажылы, өөреникчилерге берген ынакшылы, деткимчези дээш тускай өөрүп четтиргенимниң сөстерин катап-катап илереттим.
Хүндүлүг ада-иелер! Уруг-дарыыңар бирги коңгадан доозукчунуң сөөлгү кежээзинге чедир солун болгаш ындыг амыр эвес орукту эртеринге киирген үлүг-хууңар, күжүңер эвээш эвес. Олар силерни ам-даа улаштыр чедиишкиннери-биле өөртүп чоруур болзун.
Хүндүлүг доозукчулар! Келир үеде амыдырал-чуртталгаңарның оруун айтыр шыңгыы шиитпирлерниң эргининде турар силер. Кызымаккай, күш-ажылчы чорууңардан төрээн республикаңарның, чурттуң база силерниң келир үеңер дыка хамааржыр. Бөгүнгү доозукчу кежээ силерниң чалыы үеңерниң байырлалы, чаа-чаа идегелдерниң, күзелдерниң боттанылгазы болуп, кезээде уттундурбас артарын сеткилим ханызындан күзедим. Ак орукту болгаш чедиишкиннерни күзеп тур мен!» — деп, ол бодунуң блогунда бижээн.
Оон аңгыда доозукчуларга Тываның Өөредилге яамызының сайыды Елена Хардикова байыр чедирген сөстерин дамчыткан.
«Эргим оолдар, уруглар! Бөгүн улуг амыдыралче баштайгы базымыңарны кылып, төрээн чуртуңарның сайзыралы дээш ажылдаар, өөренир, эртемиңер бедидер, арга-дуржулгаңарны хевирлээр үеде келгениңер ол болур. Мурнуңарда сорулгаларны күүседип шыдаптар деп, силерге бүзүрелим улуг. Ада-иеңер, башкыларыңар база бүдүн Тыва силерге чоргаарланыр.
Бо чылын чүс ажыг доозукчу алдын, мөңгүн медальдар-биле доозарын демдеглекседим. Ол дээрге билиглерже чүткүлүңерниң, кызымаккайыңарның база башкыларның болгаш чоок кижилериңерниң күжүнүң түңнели-дир.
Доозукчу бүрүзүнге бодунуң сагыш-сеткилиниң кезекчигежин сиңирген, бодунуң күжүнге бүзүрелди оттурган, кижизиг чорукка болгаш сорулгаларын чедип алыр кылдыр өөреткен башкыларга өөрүп четтиргенимни илереттим.
Доозукчуларны бут кырынга тургускан, кижизиткен, амыдыралда эгин кожа деткимчени көргүзүп чоруур ада-иелерге, кырган-аваларга, кырган-ачаларга тускай өөрүп четтиргенимни илередип тур мен» — деп, сайыт демдеглээн.
Цырена Доспан, Кызылдың 17 дугаар школазының 11 «а» клазының доозукчузу:
— Күрүне шылгалдаларын чедиишкинниг дужаап алганывыска өөрүп тур бис. Ынчалза-даа школавыстан ужуп үнүп турарывыс сүрээденчиг-даа. Башкывыс Татьяна Кара-ооловна Байырга бисти өөредип, чагып-сургап, төлептиг кижилер кылдыр өөреткени дээш четтирдивис. Доозукчу кежээ эрте берзе-даа, башкыларывысты черле утпас бис.
Виктория Монгуш, Кызылдың 9 дугаар гимназиязының 11 «б» клазының доозукчузу:
— Бисти өөредип турган шыдамыккай башкыларывыска өөрүп четтиргенивисти илередип тур мен. Эң ылаңгыя төөгү башкызы Айлана Калан-ооловна Чамыянның кичээлдери караамда чуруттунуп арткан. Өске-даа башкыларывыстың кичээлдери черле солун эртер. Хөй-хөй чаштарны өөредип, амыдыралдың улуг оруунче үдээн башкыларга изиг байыр!
Эртине Монгуш, Кызылдың 9 дугаар гимназиязының 11 «в» клазының доозукчузу:
— Бөгүн чүгле доозукчуларның байырлалы эвес, а башкыларның, ада-иелерниң база өөрүшкүзү. Аас-кежиктиг доозукчу – башкыга шаңнал. Ооң 10 чыл дургузунда ажыл-ижиниң түңнели. Ынчангаш башкыларымга моон-даа соңгаар чедиишкинниг, чайыннанчак сылдыстар дег доозукчуларны күзээр-дир мен.
Мира КОНГУЛ-ООЛ
