Бо чылын 1941-1945 чылдарда Ада-чурттуң Улуг дайынынга Тиилелгениң 80 чыл оюнга тураскааткан байырлыг хемчеглер Россияның шупту регионнарынга бүдүн чыл дургузунда болуп эртер.
«Тиилелгениң эки турачылары» Бүгү-российжи хөй-ниити шимчээшкининиң регионда салбырының даргазы Азиана Увангурнуң дыңнадып турары-биле алырга, эки турачылар корпузунда 2700 кижи бактаап турар.
– «Тиилелгениң эки турачылары» шимчээшкинниң идепкейжилери Улуг Тиилелгениң 80 чыл оюнга аңгы-аңгы хемчеглерни эттирип турар. Республиканың аңгы-аңгы булуңнарындан 2700 эки турачы өөредилгени эрткеш, биске каттышкан.
Чурттувустуң эӊ-не кол болгаш ыдык байырлалынга чердир он хонук арткан. Эки турачылар корпузунуң идепкейжилери Улуг Тиилелгениң байырлыг чыскаалының белеткелинге болгаш эрттиреринге дузалажыр. Олар Аныяктар ордузунга өөредилгени эрткен.
Чоокта чаа бистиң идепкейжилеривис «Георгий кожаазы», «Кызыл гвоздика» болгаш «Тиилелгениң диктантызы» акцияларга каттышкан. Ук хемчеглер Тиилелге хүнүнүң бүдүүзүнде болуп эрткен болгаш Ада-чурттуң Улуг дайынының үезинде чоннуң маадырлыг чоруунга төөгүлүг сактыышкынны болгаш хүндүткелди кадагалап арттырарынче угланган. «Кызыл гвоздика» акцияны Тывада «Салгалдарның сактыышкыны» ачы-буян фондузу-биле кады демнежип эрттирип турар бис.
Тиилелгениң эки турачылары хүндүлүг Маадырларывыс – Ада-чурттуң Улуг дайынының хоочуннарынга болгаш тылдың ишчилеринге деткимге көргүзериниң талазы-биле үлүг-хуузун киириштирип турар. Ада-чуртчу акцияларга киржилге уламчылаар. Ол ышкаш тускай шериг операциязының киржикчилеринге болгаш оларның өг-бүлелеринге доктаамал дузалажып турар.
